قازاقستاندا وندىرىلەتىن بالىق ءونىمى الەمنىڭ 21 ەلىنە ەكسپورتتالادى
استانا. KAZINFORM - ەلدە بالىق شارۋاشىلىعى تۇراقتى دامىپ كەلەدى. 2024 -جىلدىڭ قورىتىندىسى بويىنشا بالىق ونىمدەرى نارىعىنىڭ كولەمى 94,6 مىڭ توننا بولىپ، 2023 -جىلدىڭ وسى كەزەڭىمەن سالىستىرعاندا %7 عا ارتتى.
ونىڭ ىشىندە 45,2 مىڭ تونناسى تابيعي سۋ ايدىندارىنان اۋلانعان بالىققا، ال 18,2 مىڭ تونناسى بالىق ءوسىرۋ شارۋاشىلىقتارىندا وندىرىلگەن ونىمگە تيەسىلى. بالىق ونىمدەرىنىڭ ەكسپورتى 23,4 مىڭ توننا.
اۋىل شارۋاشىلىعى مينيسترلىگىنىڭ مالىمەتىنشە، بالىقتى قايتا وڭدەۋمەن 72 كاسىپورىن اينالىسادى، ونىڭ ىشىندە 20 كاسىپورىن ءوز ونىمدەرىن ەۋروپالىق وداق ەلدەرىنە ەكسپورتتايدى. بۇگىندە قازاقستاندا وندىرىلەتىن 50 دەن استام اتاۋلى بالىق ءونىمى الەمنىڭ 21 ەلىنە ەكسپورتتالادى.
- مەملەكەت اكۆاكۋلتۋرانى دامىتۋعا بەلسەندى قولداۋ كورسەتىلىپ وتىر. 2021 -جىلدان بەرى سالاعا بولىنەتىن سۋبسيديا كولەمى 9 ەسەگە ءوسىپ، 2024 -جىلى 4,5 ميلليارد تەڭگەگە جەتتى. ينۆەستيسيالىق شىعىنداردىڭ %25 نا دەيىن، جەم-شوپكە جۇمسالاتىن شىعىنداردىڭ %30 ى، شاباق، انالىق بالىق جانە ۆەتەريناريالىق پرەپاراتتار ساتىپ الۋعا كەتەتىن شىعىنداردىڭ %50 ى مەملەكەت تاراپىنان وتەلەدى. ناتيجەسىندە، سوڭعى ءۇش جىلدا بالىق ءوسىرۋ شارۋاشىلىقتارىنىڭ سانى ەكى ەسەگە ارتىپ، 600 گە جەتتى، - دەلىنگەن حابارلامادا.
2024 -جىلى بالىق شارۋاشىلىعى سالاسىنداعى نەگىزگى كاپيتالعا سالىنعان ينۆەستيتسيالار 5,2 ميلليارد تەڭگەدەن استى. قۋاتتىلىعى 2,5 مىڭ توننا بولاتىن 30 جوبا ىسكە اسىرىلدى. سونىمەن قاتار جىلىنا 50 مىڭ تونناعا دەيىن بالىق وندىرۋگە مۇمكىندىك بەرەتىن تاعى 50 ينۆەستيسيالىق جوبانىڭ جۇزەگە اسىرىلۋى جالعاسىپ جاتىر.
سالانى دامىتۋ 2021- 2030 -جىلدارعا ارنالعان ەلدىڭ بالىق شارۋاشىلىعىن دامىتۋ باعدارلاماسى اياسىندا جۇزەگە اسىرىلىپ جاتىر. باعدارلاما مەملەكەتتىك قولداۋ شارالارىن، اكۆاكۋلتۋرانى باقىلاۋ بويىنشا اقپاراتتىق جۇيەلەردى ەنگىزۋدى، وتاندىق وندىرۋشىلەردى قولداۋدى جانە بالىق رەسۋرستارىن ساقتاۋ مەن مولايتۋعا باعىتتالعان ءىس-شارالاردى قامتيدى.
- بالىق پوپۋلياتسياسىن قالپىنا كەلتىرۋ ماقساتىندا تابيعي سۋ ايدىندارىنا جىل سايىن شاباق جىبەرۋ جۇمىستارى جۇرگىزىلەدى. 2024 -جىلى مەملەكەتتىك تاپسىرىس اياسىندا سۋ ايدىندارىنا 54 ميلليون دانا باعالى بالىق تۇرلەرىنىڭ شاباعى جىبەرىلدى.
دايىن ءونىمدى قايتا وڭدەۋدى ىنتالاندىرۋ جانە ەكسپورتتى ارتتىرۋ ماقساتىندا وڭدەلمەگەن بالىقتى سىرتقا شىعارۋعا شەكتەۋ قويىلدى. 2024- 2025 -جىلدارى كوكسەركە مەن سوم بالىعىن ەكسپورتتاۋعا التى ايلىق تىيىم سالۋ ەنگىزىلدى. بۇل اتالعان بالىق تۇرلەرىن قايتا وڭدەۋگە ارنالعان شيكىزات كولەمىن %23 عا ارتتىرۋعا مۇمكىندىك بەردى، - دەلىنگەن مينيسترلىك حابارلاماسىندا.
وڭدەلگەن بالىق ونىمدەرىن سۋبسيديالاۋ مەحانيزمدەرىن ەنگىزۋ، سونداي-اق %2,5 مولشەرلەمەمەن بالىق ءوسىرۋ جانە وڭدەۋ جوبالارىن قارجىلاندىرۋعا ارنالعان بيۋدجەتتىك نەسيەلەۋ باعدارلامالارىن كەڭەيتۋ جوسپارلانىپ وتىر.
وتكەن جىلى «e-fish» اتتى بالىق پەن بالىق ونىمدەرىنىڭ زاڭدىلىعىن قاداعالاۋعا ارنالعان اقپاراتتىق جۇيە پيلوتتىق رەجيمدە ىسكە قوسىلدى.
كاسپي يتبالىعى پوپۋلياتسياسىن ساقتاۋ ماقساتىندا «كاسپي يتبالىعى» مەملەكەتتىك تابيعي رەزەرۆاتى قۇرىلدى. اتىراۋداعى بەكىرە زاۋىتىن جاڭعىرتۋ جۇمىسى جۇرگىزىلىپ جاتىر، سونداي-اق قىزىلوردا وبلىسىندا ينكۋباتسيالىق سەحتىڭ قۇرىلىسى باستالدى.
قازىرگى ۋاقىتتا سەناتتا سالانىڭ ءوسۋىن ىنتالاندىرۋعا، ونىڭ اشىقتىعىن ارتتىرۋعا جانە ينۆەستيسيا تارتۋعا باعىتتالعان «اكۆاكۋلتۋرا تۋرالى» زاڭ جوباسى قارالىپ جاتىر.
