قازاقستاندا تۇرمىستىق قوقىستىڭ 25 پايىزى قايتا وڭدەلەدى

استانا. KAZINFORM - ەلىمىزدە جىل سايىن 4,5 ميلليون توننادان استام كوممۋنالدىق قالدىق جينالادى، ال ولاردى قايتا وڭدەۋ دەڭگەيى وتكەن جىلى 25,8 پايىز بولدى. بۇل تۋرالى ق ر ەكولوگيا جانە تابيعي رەسۋرستار ۆيتسە-ءمينيسترى مانسۇر وشۋربايەۆ ايتىپ بەردى.

- جاعدايدى جاقسارتۋ ءۇشىن زاماناۋي ينفراقۇرىلىم بەلسەندى دامىپ كەلەدى. قالالاردا قايتا وڭدەلگەن زاتتار ءۇشىن بونۋس تولەيتىن ەكوبوكستار مەن فاندوماتتار ورناتىلىپ جاتىر. اي سوڭىنا دەيىن پيلوتتىق رەجيمدە استانا مەن جەزقازعاننىڭ 129 مەكتەبىندە قوقىستى بولەك جيناۋعا ارنالعان 1000 نان استام ەكوبوكس ورناتىلادى. بۇل شارا پوليگونعا كەتەتىن قوقىس كولەمىن ازايتۋعا ىقپال ەتەدى، - دەدى م. وشۋربايەۆ پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن بريفينگتە.

قالدىقتاردى سۇرىپتاۋ مەن قايتا وندەۋ ءۇشىن ينفراقۇرىلىم قۇرۋ جۇمىستارى دا جالعاسىن تاپتى. قازىر 63 جوبا ماقۇلداندى، بۇل جىل سايىنعى وڭدەۋ قۋاتىن 1,1 ميلليون تونناعا ارتتىرۋعا مۇمكىندىك بەرەدى.

ونىڭ ىشىندە 14 جوبا 52,4 ميلليارد تەڭگە قاراجات الدى، ال 106,9 ميلليارد تەڭگەگە تاعى 23 جوبا ساراپتامانىڭ سوڭعى ساتىسىندا تۇر. ءبىرقاتار جوبا ىسكە اسىرۋ كەزەڭىنە ءوتتى، كەيبىرى بويىنشا جابدىقتار ورناتىلىپ جاتىر.

- مىسالى، قوستاناي وبلىسىندا قاتتى تۇرمىستىق قالدىقتاردى سۇرىپتاۋ جانە قۇرىلىس قالدىقتارىن قايتا وندەۋ جوباسى قولعا الىندى. قازىرگى تاڭدا قوقىس سۇرىپتاۋ كەشەنى مەن جىلجىمالى ۇساقتاعىش ساتىپ الىندى. جوبا جىل سايىن 50 مىڭ توننا تۇرمىستىق قالدىقتى جانە 70 مىڭ توننا قۇرىلىس قالدىقتارىن سۇرىپتاۋدى كوزدەيدى، - دەدى ۆيتسە-مينيستر.

ەسكە سالا كەتسەك، «تازا قازاقستان» اكسياسى اياسىندا وتكەن جىلدان بەرى ەل بويىنشا 1,4 ميلليون توننا قالدىق جينالىپ، 2,4 ميلليون اعاش وتىرعىزىلدى. اكسياعا شامامەن 9 ميلليون ادام قاتىسقان، ونىڭ ىشىندە 450 مىڭ ەرىكتى بار.