قازاقستاندا ۇساقتاۋ شارلارىن وندىرەتىن زاۋىت سالىنادى
استانا. KAZINFORM - كاسىپورىن 2028 -جىلى تالدىقورعاندا جۇمىسىن باستايدى دەپ جوسپارلانۋدا. ونىڭ وندىرىستىك قۋاتتىلىعى جىلىنا 150 مىڭ توننا ءونىمدى قۇرايدى.
استانادا KAZ Minerals توبى مەن چيليلىك ME Elecmetal كومپانياسى اراسىندا وففتەيك-كەلىسىمشارتقا قول قويىلدى.
جوباعا تارتىلاتىن ينۆەستيسيا قۇنى شامامەن 85 ميلليون ا ق ش دوللارىن قۇرايدى. باستاما ءوز كەزەگىندە 100 جاڭا جۇمىس ورنىن اشىپ، ءوڭىردىڭ وندىرىستىك الەۋەتىن دامىتۋعا قوماقتى ۇلەس قوسادى جانە مەملەكەتتىك بيۋدجەتكە تۇسەتىن ءتۇسىمدى ارتتىرادى دەپ كۇتىلۋدە.
تاۋ-كەن ونەركاسىبىندە ۇساقتاۋشى شارلاردى شىعارۋ ءىسىنىڭ ماڭىزى جوعارى. KAZ Minerals توبى جىل سايىن اتالعان ءونىمنىڭ 70 مىڭ تونناسىن پايدالانۋ ءۇشىن شامامەن 100 ميلليون دوللار جۇمسايدى. قازاقستاندا مۇنداي ساپاداعى شارلاردىڭ بولماۋى سەبەپتى كومپانيا ۇساقتاۋشى شارلار ءوندىرىسىنىڭ الەمدىك كوشباسشىسى - ME Elecmetal ءونىمىن تۇتىنادى.
«KAZ Minerals Management» ج ش س باسقارما ءتوراعاسى ەلدار مامەدوۆ ME Elecmetal كومپانياسىمەن ارىپتەستىك جاڭا مۇمكىندىكتەرگە جول اشاتىنىنا توقتالدى.
- KAZ Minerals توبى ءارقاشان ەل باسشىلىعىنىڭ يندۋستريالىق ساياساتىنا سايكەس كەلەتىن وندىرىستىك سيكلدىڭ بارىنشا تيىمدىلىگىنە باعىتتالعان ۇزدىك شەشىمدەردى ەنگىزۋگە ۇمتىلادى. ساپالى ۇساقتاۋ شارلارىن پايدالانۋ تاۋ-كەن بايىتۋ كەشەندەرىنىڭ ونىمدىلىگىنە اسەر ەتەتىن نەگىزگى فاكتور. 2023 -جىلى ءبىز ءارتۇرلى جەتكىزۋشىلەردىڭ ءونىم ۇلگىلەرىن ولاردىڭ سيپاتتامالارىن بۇرىن قولدانىلعان ماتەريالدارمەن سالىستىرا وتىرىپ، اۋقىمدى سىناقتان وتكىزدىك. باعالاۋدىڭ نەگىزگى كريتەريلەرى شارلاردى تۇتىنۋ، ۇنتاقتالعان كەننىڭ ءبىر تونناسىنا ەنەرگيا تۇتىنۋ، شارلاردىڭ بولىنۋىنە بايلانىستى ءوندىرىس ايالدامالارىن ازايتۋ جانە، ارينە، مەتال ءوندىرۋدى ارتتىرۋ بولدى. ME Elecmetal ءونىمى بارلىق كورسەتكىشتەر بويىنشا ۇزدىك ناتيجە بەردى، - دەيدى ءتوراعا.
ەلدار مامەدوۆتىڭ ايتۋىنشا، وففتەيك-كەلىسىمشارتتى بەكىتۋ - جاي عانا ىسكەرلىك كەلىسىم ەمەس، قازاقستاننىڭ تاۋ-كەن ءوندىرىسىن دامىتۋ جانە ونىڭ الەمدىك نارىقتاعى باسەكەلەستىككە قابىلەتتىلىگىن ارتتىرۋعا باعىتتالعان ستراتەگيالىق ارىپتەستىك بولىپ سانالادى. زاۋىت قۇرىلىسى ساپالى ونىمگە سۇرانىستى قاناعاتتاندىرۋدان بولەك، جەرگىلىكتى ءوندىرىستى دامىتۋعا، جاڭا جۇمىس ورىندارىن اشۋعا جانە جاڭا تەحنولوگيالاردى ىسكە قوسۋعا مۇمكىندىك بەرەدى.
Kaz Minerals - قازاقستانداعى زاماناۋي، ءىرى اۋقىمدى، ازشىعىندى كارەرلىك تيپتەگى تاۋ-كەن ءوندىرىسىن دامىتۋعا باعىتتالعان، ءوسۋ الەۋەتى زور مىس ءوندىرۋشى كومپانيا. توپ وپەراتسيالىق ءىس-قىزمەتىن اباي وبلىسىندا ورنالاسقان اقتوعاي مىس كەنىشىندە، ورلوۆ كەنىشى مەن فابريكاسىندا جانە پاۆلودار وبلىسىنداعى بوزشاكول كەنىشىندە، شىعىس قازاقستان وبلىسىنداعى ەكى كەنىش پەن كەن بايىتۋ فابريكاسىندا، قىرعىزستانداعى بوزىمشاق مىس-التىن كەنىشىندە جۇرگىزەدى.
ءبىز بۇعان دەيىن عىلىم جانە جوعارى ءبىلىم مينيسترلىگى مەن KAZ Minerals توبىنىڭ استانادا عىلىمي-يننوۆاتسيالىق حاكاتون وتكىزگەنى تۋرالى جازعانبىز.
اۆتور
اينۇر تۋماكبايەۆا
