قازاقستاندا قۇرىلىسى پروبلەماعا اينالعان نەشە تۇرعىن ءۇي كەشەنى بار
استانا. KAZINFORM - ونەركاسىپ جانە قۇرىلىس ۆيتسە-ءمينيسترى قۋاندىق قاجكەنوۆ قازاقستان اۋماعىنداعى پروبلەمالى تۇرعىن ۇيلەردىڭ قۇرلىسى جونىندە تۇسىنىك بەردى.
- قازىر 42 پروبلەمالى نىسان بولدى، ونىڭ ەكەۋى بيىلعى ءبىرىنشى توقساندا اتىراۋ جانە شىعىس قازاقستان وبلىستارى اۋماعىندا تاپسىرىلدى. ەندى 40 نىسان قالدى. 10 نان استامىن بيىل جول كارتاسى بويىنشا اياقتايمىز، ال قالعانى 2026 -جىلى تاپسىرىلادى. ويتكەنى كەيبىرىندە سوت پروتسەسى ءالى جالعاسىپ جاتىر، - دەدى ق. قاجكەنوۆ سەناتتا تىلشىلەر سۇراعىنا جاۋاپ بەرە وتىرىپ.
بۇدان بولەك ول ۇلەسكەر قارجىسىن زاڭسىز تارتقان 99 نىسان جايىندا ايتىپ بەردى.
- وسى 99 نىسان جوبالىق- سمەتالىق قۇجاتتاماعا سايكەس زاڭناما اياسىندا سالىنىپ جاتىر. الايدا ۇلەسكەرلەردەن اقشا تارتۋى زاڭسىز بولدى. كەيبىر نىسانداردا قۇرىلىس جالعاسىپ كەلەدى. سونىمەن قاتار، توقتاپ تۇرعان نىساندار دا بار، ولار بويىنشا سوت پروتسەسى اياقتالماعان، - دەدى ۆيتسە-مينيستر.
ونىڭ سوزىنە قاراعاندا، وسىنداي زاڭسىز ارەكەتتەرگە جول بەرمەۋ ءۇشىن بۇگىن سەناتتا ماقۇلدانعان زاڭ اياسىندا ءتيىستى جاۋاپكەرشىلىك كۇشەيتىلەدى.
بۇدان بۇرىن حابارلانعانداي، بۇگىن سەناتتىڭ جالپى وتىرىسىندا «كەيبىر زاڭنامالىق اكتىلەرگە تۇرعىن ءۇي قۇرىلىسىنا ۇلەستىك قاتىسۋ، اۆتوموبيل جولدارى جانە مۇگەدەكتىگى بار ادامداردى تاسىمالداۋ جونىندەگى قىزمەتتەردى كورسەتۋ ماسەلەلەرى بويىنشا وزگەرىستەر ەنگىزۋ تۋرالى» زاڭى ەكى وقىلىمدا قارالىپ، ماقۇلداندى.
