قازاقستاندا قانشا توقايەۆ، قايرات نۇرتاس جانە نازاربايەۆ بار؟

استانا. KAZINFORM - قازاقستاندا ەكس-پرەزيدەنت نازاربايەۆتىڭ، قازىرگى پرەزيدەنت توقايەۆتىڭ جانە باسقا دا تانىمال ادامداردىڭ قانشا اتتاسى بار؟

ۇلتتىق ستاتيستيكا بيۋروسى جولدانعان ساۋالعا جاۋاپ بەردى.

قازاقستاندا نۇرسۇلتان نازاربايەۆپەن اتتاس 49 ادام بار. ەڭ ۇلكەنى 22 جاستا، ال ەڭ كىشىسى 6 جاستا ەكەن.

ال مەملەكەت باسشىسى قاسىم-جومارت توقايەۆپەن اتتاس ءبىر ادام بار. ول - 1 جاستاعى قىزىلوردا وبلىسىنىڭ تۇرعىنى.

دىنمۇحامەد قونايەۆ ەسىمدى 5 ادام بار ەكەن. بۇل ەسىمدى ادامدار قاراعاندى وبلىسى، الماتى قالاسى، اقتوبە وبلىسى، تۇركىستان وبلىسىندا تۇرادى. ولاردىڭ ەڭ ۇلكەنىنىڭ جاسى 13 جاستا، ال ەڭ كىشكەنتايى 6 ايلىق.

تانىمال ءانشى ديماش قۇدايبەرگەنمەن اتتاس 26 ادام بار ەكەن. ولاردىڭ ەڭ ۇلكەنى 23 جاستا، كىشىسى 1 ايلىق.

قازاقستاندا ساياساتكەر يمانعالي تاسماعامبەتوۆپەن اتتاس 3 ادام بار. ولار - اقتوبە وبلىسى، باتىس قازاقستان وبلىسىنىڭ تۇرعىندارى. ال ولاردىڭ ۇلكەنى 18 جاستا، كىشىسى 9 جاستا.

قازاقستاندا اباي قۇنانباي ۇلى ەسىمدى بەس ادام بار، ولار الماتى وبلىسى، استانا قالاسى، تۇركىستان وبلىسى، جامبىل وبلىسى، قىزىلوردا وبلىسىندا تۇرادى. ولاردىڭ اراسىندا ەڭ ۇلكەنى 25 جاستا، كىشىسى 1 جاستا.

ال اباي قۇنانبايەۆ دەگەن 10 ادام بار ەكەن. بۇل ەسىمدەگى ازاماتتار اقتوبە وبلىسى، شىعىس قازاقستان وبلىسى، جامبىل وبلىسى، الماتى قالاسى، اباي وبلىسى، قىزىلوردا وبلىسىندا تۇرادى، ۇلكەنى 39 جاستا، كىشىسى 3 جاستا.

اقىن ماعجان جۇمابايەۆ ەسىمدى 76 ادام بار ەكەن. ۇلكەنى 33 جاستا، ەڭ كىشكەنتايى 1 ايلىق.

شوۋ-بيزنەستەگى تانىمال انشىلەر قايرات نۇرتاس، تورەعالي تورەالىمەن دە اتتاس جاندار بار ەكەن.

ماسەلەن، قايرات نۇرتاسپەن اتتاس 12 ادام بار. ولار تۇركىستان وبلىسى، اباي وبلىسى، قوستاناي وبلىسى، ماڭعىستاۋ وبلىسى، جامبىل وبلىسى، اتىراۋ وبلىسى، استانا قالاسى، الماتى قالاسىندا تۇرادى. ۇلكەنىنىڭ جاسى 11 دە، كىشىسى 1 جاستا.

تورەعالي تورەالى ەسىمدى ءبىر ادام بار. ول ماڭعىستاۋ وبلىسىندا تۇرادى، جاسى 8 دە.

 

 

اقپارات دەرەككوزى: massaget.kz