قازاقستاندا قانشا شەتەل ازاماتى زاڭدى جۇمىس ىستەپ ءجۇر

استانا. قازاقپارات - 2024 -جىلعى 1-ساۋىردەگى جاعداي بويىنشا جەرگىلىكتى اتقارۋشى ورگانداردىڭ رۇقساتىمەن قازاقستان اۋماعىندا 13536 شەتەل ازاماتى ەڭبەك ەتەدى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتى مالىمدەدى.

«شەتەل جۇمىس كۇشىن تارتۋعا رۇقساتتاردىڭ اراسىندا مىناداي ساناتتار بار: باسشىلار مەن ولاردىڭ ورىنباسارلارى ءۇشىن 605 رۇقسات (ءبىرىنشى سانات)، قۇرىلىمدىق بولىمشەلەردىڭ باسشىلارى ءۇشىن 2793 رۇقسات (ەكىنشى سانات). تارتىلعان شەتەل جۇمىس كۇشىنىڭ نەگىزگى بولىگى ءۇشىنشى (ماماندار) جانە ءتورتىنشى (بىلىكتى جۇمىسشىلار) ساناتتارعا جاتادى – تيىسىنشە ولار 5914 جانە 570 ادام. سونداي-اق ماۋسىمدىق جۇمىستارعا 2458 ادام، ال كورپوراتيۆتىك اۋىستىرۋ اياسىندا 1196 ادام تارتىلدى»، - دەلىنگەن حابارلامادا.

ۆەدومستۆونىڭ مالىمەتىنشە، قازىرگى ۋاقىتتا قازاقستاندا شجك پايدالاناتىن 1728 جۇمىس بەرۋشى بار. ولاردا 459 مىڭنان استام قازاقستان ازاماتى جۇمىس ىستەيدى، بۇل قىزمەتكەرلەردىڭ جالپى سانىنىڭ 99,2 پايىزى.

ەكونوميكالىق قىزمەت تۇرلەرى بويىنشا ەڭ كوپ جۇمىس ىستەيتىندەر قۇرىلىس سالاسىندا - 4297 ادام (31,7 پايىز)، اكىمشىلىك جانە كومەكشى قىزمەتتەر - 1629 (12 پايىز)، اۋىل، ورمان جانە بالىق شارۋاشىلىعى - 1482 ادام (10,9 پايىز)، تاۋ - كەن ونەركاسىبى جانە كارەرلەردى قازۋ - 1285 ادام (9,4 پايىز)، وڭدەۋ ونەركاسىبى - 1248 ادام (9,2 پايىز)، كاسىبي، عىلىمي جانە تەحنيكالىق قىزمەت - 797 ادام (5,9 پايىز).

ەڭبەك ميگرانتتارى كەلەتىن نەگىزگى ەلدەر: قىتاي - 4011 ادام (29,6 پايىز)، وزبەكستان - 1577 ادام (11,6 پايىز)، ءۇندىستان - 1187 ادام (8,7 پايىز)، تۇركيا - 1058 ادام (7,8 پايىز).

ىشكى ەڭبەك نارىعىن قورعاۋ ماقساتىندا ق ر ەڭبەك جانە حالىقتى الەۋمەتتىك قورعاۋ مينيسترلىگى جىل سايىن رەسپۋبليكاعا شەتەل ماماندارىن تارتۋعا كۆوتا بەلگىلەيدى جانە بولەدى. 2024 -جىلى جالپى كۆوتا رەسپۋبليكاداعى جۇمىس كۇشىنىڭ سانىنا قاتىستى 0,23 پايىز نەمەسە 22 مىڭ بىرلىك مولشەرىندە بەلگىلەندى.