قازاقستاندا قانشا ادامنىڭ ءوز ءۇيى بار؟
قازاقستاندا باسپاناعا سۇرانىس كوبەيمەسە، ازايعان ەمەس. بيىل 1-قاڭتارداعى مالىمەت بويىنشا قازاقستاندا 2493685 تۇرعىن ءۇي بار، - دەپ حابارلايدى Aikyn.kz.
قازاقستان تۇرعىندارىنىڭ جارتىسىنان كوبىنىڭ باسپاناسى بار. اتاپ ايتقاندا، Freedom Finance Global زەرتتەۋىنە سۇيەنسەك، حالىقتىڭ جارتىسىنان استامىندا (52,2 پايىز) تۇرعىن ءۇيى بار. ونىڭ ىشىندە، جاستاردىڭ ۇلەسى - 29,7 پايىز، ال جاسى ۇلكەندەردىڭ 75,5 پايىزىندا باسپانا بار. 30 بەن 44 جاس ارالىعىندا يپوتەكامەن ءۇي العانداردىڭ ۇلەسى - 45,8 پايىز. تۇرعىلىقتى جەرى بويىنشا قالادا - 50,7 پايىز، اۋىلدا - 54,5 پايىز.
ساۋالناماعا قاتىسقان قازاقستان تۇرعىندارىنىڭ 9,3 پايىزىنىڭ مەنشىگىندە جالعا بەرە الاتىن قوسىمشا باسپانا بار. شىن مانىندە، ولاردىڭ جارتىسىنان ازى (45,6 پايىز) عانا ولاردى جالعا بەرەدى. اۋىلدىق جەرلەردە قوسىمشا تۇرعىن ءۇيدى 41,9 پايىز جالعا بەرەدى. قالالىق جەردە 49,1 پايىز جالعا بەرەدى.
جۇرتتىڭ كوپشىلىگى جەكەمەنشىك ۇيدە تۇرادى (62,7 پايىز). ايماقتاردا پاتەر يەلەرىنىڭ سانى - ورتا ەسەپپەن 35,4 پايىز. رەسپۋبليكالىق ماڭىزى بار قالالاردا بۇل كورسەتكىش 59,2 پايىزعا دەيىن ارتادى. كوپپاتەرلى ءۇيدىڭ ەڭ كوبى استانادا - 71,7 پايىز. الماتىدا بۇل كورسەتكىش - 55,8 پايىز. شىمكەنتتە تارازى باسى تەڭ.
بيىل 1-قاڭتارداعى مالىمەت بويىنشا قازاقستانداعى تۇرعىن ۇيلەردىڭ جالپى سانى - 2493685. ونىڭ ىشىندە، ايتارلىقتاي ۇلەس جەكە تۇرعىن ۇيلەرگە تيەسىلى - 2182144 (87,5 پايىز)، قالعان بولىگى - كوپپاتەرلى ۇيلەرگە تيەسىلى - 311541 (12,5 پايىز). ياعني، كوپپاتەرلى ۇيلەر ىقشام جانە پاتەر سانى كوپ.
وبلىستار بويىنشا تۇركىستان وبلىسىندا ءۇي كوپ. ەڭ كوبى 345,2 مىڭ، اۋىلدىق جەرلەردەگى ۇيلەر سانى - 266,3 مىڭ.
الماتى قالالىق ەلدى مەكەندەردەگى جەكە جانە كوپپاتەرلى تۇرعىن ۇيلەر سانى بويىنشا كوش باسىندا كەلەدى. مەگاپوليستە 140,8 مىڭ جەكە (ج ت ءۇ جالپى سانىنىڭ 15,9 پايىز) جانە 27,5 مىڭ كوپپاتەرلى تۇرعىن ۇيلەر (ك پ ت ءۇ جالپى سانىنىڭ 21 پايىز) بار. جەكە تۇرعىن ۇيلەر سانى بويىنشا ەكىنشى جانە ءۇشىنشى ورىندا شىمكەنت - 137,1 مىڭ ءۇي (15,4 پايىز) جانە تۇركىستان وبلىسى - 75,9 مىڭ ءۇي (8,5 پايىز)، كوپ پاتەرلى ۇيلەر سانى بويىنشا قاراعاندى جانە اقمولا وبلىستارى - تيىسىنشە 17,4 (13,3 پايىز) جانە 7,8 مىڭ بىرلىك (6 پايىز) كوش باستاپ تۇر.
