قازاقستاندا «ناۋرىز» تۇرعىن ءۇي باعدارلاماسى ىسكە قوسىلادى

 استانا. KAZINFORM - بيىل مامىردا ەلىمىزدە تاعى ءبىر تۇرعىن ءۇي يپوتەكاسى اشىلادى. جاڭا تۇرعىن ءۇي باعدارلاماسىنىڭ تالاپتارى مەن ەرەجەلەرى تۋرالى «وتباسى بانكىنىڭ» وكىلدەرى ايتىپ بەردى.

«ناۋرىز» يپوتەكاسىنىڭ باسقا تۇرعىن ءۇي باعدارلامالارىنان باستى ايىرماشىلىعى - سالىمشىنىڭ دەپوزيت (وتباسى بانكىندەگى دەپوزيت) مەرزىمىنە قارامايدى، ياعني بۇگىن دەپوزيت اشىپ، ەرتەڭ باعدارلاماعا قاتىسۋعا بولادى. ءبىراق دەپوزيتتە كەم دەگەندە 1 ميلليون تەڭگە بولۋى ءتيىس. تاعى ءبىر تالاپ قاتىسۋشى مەن ونىڭ وتباسى مۇشەلەرىنىڭ اتىندا سوڭعى 5 جىل ىشىندە جىلجىمايتىن مۇلىك (تۇرعىن ءۇي، جەر تەلىمى تاعى سول سياقتى) بولماۋى قاجەت.

نەسيە مەرزىمى - 19 جىل %20. تاعى ءبىر ايتا كەتەتىن جايت، تۇرعىن ءۇي كەزەگىندە تۇرعان ازاماتتارعا نەسيە %7، ال كەزەكتە تۇرماعاندارعا %9 بەرىلەدى. تۇرعىن ءۇي باعدارلاماسىنا 18-62 جاس ارالىعىنداعى قازاقستان ازاماتى قاتىسا الادى. سونداي- اق، قاتىسۋشى «وتباسى بانكىندە» دەپوزيتى بار سالىمشى بولۋى جانە تابىس كوزىن راستاۋى مىندەتتى.

ءوتىنىش 2024 -جىلعى 1-مامىردان باستاپ otbasybank.kz (باسپانا ماركەت پلاتفورماسى) سايتى ارقىلى ونلاين فورماتتا قابىلدانادى. وتىنىشتەردى قاراۋ بارىسىندا دەپوزيتتىڭ اشىلۋ مەرزىمى، ونداعى سوما مەن سىياقى كولەمى جانە قاتىسۋشىنىڭ وتباسىلىق جاعدايى ەسكەرىلەدى.

«وتباسى بانكى» وكىلدەرىنىڭ ايتۋىنشا، «ناۋرىز» تۇرعىن ءۇي يپوتەكاسىنا 300 ميلليارد تەڭگە بولىنەدى جانە تۇرعىن باعدارلاماسى 7-8 -جىلعا جالعاسادى. ايتا كەتسەك، استانا، الماتى، شىمكەنت قالاسى جانە وبلىس ورتالىقتارىندا تەك العاشقى نارىقتاعى تۇرعىن ۇيلەر ۇسىنىلادى.

ەسكە سالا كەتسەك، 15-ناۋرىزدا وتكەن ۇلتتىق قۇرىلتايدىڭ ءۇشىنشى وتىرىسىندا مەملەكەت باسشىسى باسپانا جۇرتتىڭ تۇرمىس ساپاسىن تانىتاتىن تاعى ءبىر ماڭىزدى كورسەتكىش دەي كەلە، ەلىمىزدە جاڭا تۇرعىن ءۇي باعدارلاماسىن قولعا الۋ كەرەكتىگىن ايتقان ەدى.