قازاقستاندا مەلودراما، دەتەكتيۆ، حوررور جانرلارى دامىسا دەيمىز - قوبىلاندى بولات
استانا. KAZINFORM - بۇگىن ەلوردادا Comic Con Astana-2025 – ت م د مەن ورتالىق ازياداعى ەڭ ءىرى پوپ-مادەنيەت فەستيۆالى باستالدى.
شارادا كوميكس، كينو، ويىن جانە پوپ- مادەنيەت سۇيەر قاۋىم باس قوسادى. باسقوسۋدا قوناق بولعان بەلگىلى اكتەر قوبىلاندى بولات قازاقستانداعى كينويندۋستريانىڭ دامۋى تۋرالى پىكىر ءبىلدىردى.
- مەنىڭ ويىمشا قازىرگى تاڭداعى قازاق كينويندۋسترياسى جاقسى دامىپ كەلە جاتىر. رەجيسسەر، پروديۋسەر، سەناريست، اكتەرلار بولسىن اركىم ءوز دەپارتامەنتىندە جان-جاقتى دامىپ جاتىر. شەتەلدەگىلەر دە كوپتەپ قىزىعۋشىلىق تانىتۋدا. جاقىندا عانا Netflix كەلىپ كەتتى. دەسە دە، قازاقستاندا مەدودراما، دەتەكتيۆ، حوررور جانرىنداعى فيلمدەر دامىسا دەيمىن. ال كومەديا ءبىزدىڭ ەلىمىزدە جەتكىلىكتى دەڭگەيگە كوتەرىلدى، - دەيدى ونەر جۇلدىزى Kazinform تىلشىسىنە بەرگەن سۇحباتىندا.
اكتەر قازاق ءتىلدى دۋبلياج سالاسىن دامىتۋعا باسا نازار اۋدارۋ كەرەكتىگىن جەتكىزدى.
- مەن اناۋ ايتارلىق كاسىبي دۋبلياج اكتەرى ەمەسپىن. ءبىراق ءبىز قولىمىزدان كەلگەنشە بارىمىزدى سالۋعا تىرىسىپ جاتىرمىز. ءبىزدىڭ ەلىمىزدە شاح-مۇراد وردابايەۆتىڭ رەجيسسەرلىعىمەن كەرەمەت جوبالار جاسالدى. ول «موانا 2»، «اۆاتار» فيلمىنىڭ 1 جانە 2-بولىمدەرى. جاقىندا 3-ءبولىمى شىعادى. وندا دا جۇمىس ىستەيمىز. ماعان بۇل سالا وتە قىزىق. قازاق دۋبلياج يندۋسترياسىن بارىنشا دامىتۋىمىز كەرەك جانە قازىر وسى دۋبلياجعا قىزىعۋشىلىق تانىتاتىن كوپتەگەن اكتەرلەر بار. سوندىقتان بۇل سالاداعى بارلىق ارىپتەستەرىمە ساتتىلىك تىلەيمىن، - دەيدى ول.
ەسكە سالا كەتەيىك، قازاقستاندىق «نابات وپەراتسياسى» مەن «اعايىندىلار» فيلمى جاقىندا عانا قىتايدا وتكەن كينوفەستيۆالدە قىتاي كورەرمەنىنە كورسەتىلەدى.
