قازاقستاندا مال ۇرلىعى جازاسى قالاي كۇشەيتىلدى

Фото: Айзада Агильбаева
Фото: Kazinform

استانا. KAZINFORM - وتكەن جىلى ەل اۋماعىندا 8,5 مىڭنان استام مال ۇرلانىپ، ونىڭ جارتىسى تابىلدى. بۇل تۋرالى ق ر ءى ءى م كريمينالدىق پوليتسيا دەپارتامەنتى باسقارما باستىعىنىڭ ورىنباسارى جاندوس باتىربەكوۆ ايتىپ بەردى.

«مال ۇرلىعى بارلىق ۇرلىقتاردىڭ 3 پايىزىن قۇراسا دا، قاراپايىم حالىققا ايتارلىقتاي زيان كەلتىرەدى. ادەتتە مال ۇرلىعىنىڭ كوپ بولىگى نەمەسە 75 پايىزى ەركىن جايىلىمدا جاسالادى. سوڭعى 5 -جىلدا مال ۇرلىعىن 62,5 پايىزعا، 2023-جىلى - 16,3 پايىزعا تومەندەتۋگە قول جەتكىزدىك. بۇل جۇمىس جالعاسۋدا»، - دەدى جاندوس باتىربەكوۆ ق ر ءى ءى م اپتالىق بريفينگىندە.

مالدىڭ ساقتالۋىن قامتاماسىز ەتۋ ءۇشىن ءىىم باستاماسىمەن جەرگىلىكتى اتقارۋشى ورگاندار وڭىرلەردىڭ ەرەكشەلىكتەرىن ەسكەرە وتىرىپ، مال جايۋ قاعيدالارىن ازىرلەدى جانە بەكىتتى، وندا مالدى ەش باقىلاۋسىز جايۋعا تىيىم سالىنعان.

ق ر اكىمشىلىك قۇقىقبۇزۋشىلىقتار تۋرالى كودەكسىنىڭ 408-بابى بويىنشا كورسەتىلگەن ەرەجەلەردى بۇزعانى ءۇشىن اكىمشىلىك جاۋاپكەرشىلىك بەلگىلەنگەن – 3 تەن 10 ا ە ك- كە دەيىن ايىپپۇل قاراستىرىلعان. وسىلايشا وتكەن جىلى 42 مىڭنان استام بۇزۋشىلىق انىقتالدى.

«قازىرگى ۋاقىتتا مال ۇرلاۋ جازاسى قىلمىستىق كودەكستە «مال ۇرلىعى» دەگەن جەكە باپتا كوزدەلگەن، ونداعى ەڭ جوعارى جازا - مۇلىكتى تاركىلەپ، 12 جىلعا دەيىن باس بوستاندىعىنان ايىرۋ. بىلىكتىلىك بەلگىسىن اۋىر قىلمىستار ساناتىنا اۋىستىرۋ ارقىلى بىرنەشە رەت مال ۇرلاعاندارعا، ءۇي-جايعا باسىپ كىرگەندەرگە جازا قاتاڭداتىلدى. بۇل جابىرلەنۋشىلەرمەن تاتۋلاسۋ ارقىلى ۇرىلاردىڭ جازادان جالتارىپ كەتپەۋىنە جانە ۇرلىقتىڭ الدىن الۋدى كۇشەيتۋگە مۇمكىندىك بەردى»، - دەيدى سپيكەر.

وتكەن جىلى رەسپۋبليكا اۋماعىندا «مال ۇرلىعى» جەدەل-پروفيلاكتيكالىق ءىس-شاراسى 4 رەت ۇيىمداستىرىلعان، ونىڭ ەكەۋى قىسقى سوعىم ماۋسىمىندا وتكەن. اتالعان ءىس شارالاردى وتكىزۋ كەزىندە مال ۇرلىعىنا قاتىسى بار 450 ادام، 75 قىلمىستىق توپ ۇستالدى. ۇرلانعان 8,5 مىڭنان استام مالدىڭ 4,5 مىڭى نەمەسە 50 پايىز تابىلىپ، يەلەرىنە قايتارىلدى.

قىلمىستىق توپتارمەن كۇرەسۋ ءۇشىن وڭىرلەردە مال بازارلارى، مال سويۋ ورىندارىندا رەيد جۇرگىزەتىن جەدەل-ىزدەستىرۋ توپتارى تۇراقتى جۇمىس ىستەيدى. وسى جۇمىستار ناتيجەسىندە 2023-جىلى 376 دان استام مال ۇرلىعى اشىلىپ، 59 قىلمىستىق توپ ۇستالعان.

سوڭعى جاڭالىقتار