قازاقستاندا كوكتەمگى مەرزىمدى اسكەرگە شاقىرۋ باستالدى

استانا. KAZINFORM - بيىل 20 مىڭنان استام ازامات اسكەر قاتارىن تولىقتىرادى. بۇل تۋرالى ق ر قارۋلى كۇشتەرى باس شتابى ۇيىمداستىرۋ-جۇمىلدىرۋ جۇمىستارى دەپارتامەنتى باستىعىنىڭ ورىنباسارى، پولكوۆنيك ازامات دوسىموۆ ايتتى.

«پرەزيدەنتتىڭ 2024-جىلعى 1- اقپانداعى 443- جارلىعىنا سايكەس، 1- ناۋرىزدان جەرگىلىكتى اتقارۋشى ورگان اكىمدەرى ورىنباسارلارىنىڭ باسقارۋىمەن قالالىق جانە اۋداندىق اسكەري قىزمەتكە شاقىرۋ كوميسسيالارى ازاماتتاردى كوكتەمگى اسكەرگە شاقىرۋدى باستادى. 2024-جىلدىڭ 30- ماۋسىمىنا دەيىن قارۋلى كۇشتەردىڭ جانە وزگە دە اسكەرلەر مەن اسكەري قۇرامداردىڭ قاتارىن اسكەرگە شاقىرۋعا كەيىنگە قالدىرۋعا نەمەسە ودان بوساتۋعا نەگىزى جوق 18 دەن 27 جاسقا دەيىنگى ارالىقتاعى 20 مىڭنان استام ەر-ازامات تولىقتىرادى. ونىڭ ىشىندە قارۋلى كۇشتەرگە - 9 مىڭنان استام، ۇلتتىق ۇلانعا - 6 مىڭنان استام، شەكارا قىزمەتىنە - 3 مىڭعا جۋىق، توتەنشە جاعدايلار مينيسترلىگى - 300 دەن استام، مەملەكەتتىك كۇزەتى قىزمەتىنە 300 گە جۋىق ادام شاقىرىلادى»، - دەدى ازامات دوسىموۆ ورتالىق كوممۋنيكاتسيالار قىزمەتىندەگى بريفينگتە.

اسكەرگە شاقىرىلۋشىلاردى حاباردار ەتۋ شاقىرۋ قاعازدارى 1414 قىزمەتى ارقىلى SMS- حابارلاما جىبەرۋ جولىمەن جۇرگىزىلەدى.

شاقىرۋ تۋرالى اقپاراتتى قورعانىس ىستەرى جونىندەگى دەپارتامەنتتەردىڭ رەسمي الەۋمەتتىك اككاۋنتتارى مەن ەلەكتروندىق پوشتا جاشىكتەرى ارقىلى الۋعا بولادى.