قازاقستاندا جول ەرەجەسىن بۇزعاندارعا نەگە ايىپپۇل كوپ سالىنادى؟
استانا. KAZINFORM – ءى ءى م اكىمشىلىك پوليتسيا كوميتەتىنىڭ ءتوراعاسى قايسار سۇلتانبايەۆ قازاقستانداعى جول قوزعالىسى ەرەجەلەرىن بۇزعانى ءۇشىن ايىپپۇلدار نەگە كوپ ەكەنىن ءتۇسىندىردى.
سۇلتانبايەۆتىڭ سوزىنشە، وسىلايشا جول ەرەجەسىن بۇزاتىن قازاقستاندىقتاردىڭ سانى ازايۋى مۇمكىن.
«بۇل ايىپپۇلداردىڭ ءبارى جول ەرەجەسىن ورەسكەل بۇزعان ادامدارعا قاتىستى. ال زاڭ بويىنشا جۇرەتىن ادام ەشقانداي ايىپپۇل تولەمەيدى. جىل باسىنان بەرى 4 اي، 20 كۇننىڭ وزىندە جول اپاتى سالدارىنان 500 ادام قازا تاپقان. اسقان جىلدامدىقپەن جۇرەتىندەردى باسقا قالاي توقتاتامىز؟
ءتىپتى استانادا ساعاتىنا 200 شاقىرىم جىلدامدىقپەن جۇرەتىندەر بەينەباقىلاۋ كامەراسىنا ءتۇسىپ قالعان. بۇل ءبىر عانا جاعداي ەمەس. مۇنداي جۇرگىزۋشىلەر تەك ايىپپۇل تولەپ قانا قويماي، جازالانۋى كەرەك. سوندىقتان ايىپپۇلدىڭ كوپ بولۋى وسىنداي جاعدايلاردى ازايتۋ ءۇشىن قابىلدانعان شارا»، - دەيدى قايسار سۇلتانبايەۆ.
