قازاقستاندا شيپاجايداعى دەمالىس قۇنى قانشا تۇرادى

استانا. KAZINFORM - دەنساۋلىعىن جاقسارتۋدى ويلايتىن ادامدار ءۇشىن كۋرورتتىق-ساۋىقتىرۋ دەمالىسىن ۇيىمداستىرۋ قاشاندا ماڭىزدى. قازاقستاندىق شيپاجايلار ەمنىڭ بىرنەشە ءتۇرىن ۇسىنادى. مينەرالدى سۋ، بالشىق، فيزيوتەراپيا، كليماتتىق ەم، ماسساج دا سۇرانىسقا يە. باعا ساۋىقتىرۋ، ەمدەۋ ورىندارىنىڭ قاي وڭىردە ورنالاسقانىنا بايلانىستى وزگەرىپ وتىرادى. Kazinform اگەنتتىگىنىڭ ءتىلشىسى قازاقستانداعى شيپاجايلاردىڭ قانداي ەم ۇسىناتىنىن، وعان قانشا قارجى كەرەك ەكەنىن انىقتاپ ءبىلدى.

ەلىمىزدى 115 شيپاجاي بار. وندا 672 دارىگەر ەم جۇرگىزەدى. بىلتىر 413 مىڭ ادام ءوز دەنساۋلىعىن نىعايتۋ ءۇشىن وسى ەمدەۋ- ساۋىقتىرۋ ورىندارىندا تىنىقتى. الايدا جىل ىشىندە قىزمەت كورسەتۋ قۇنى 8,3 پايىز كوتەرىلگەن. ال جىل باسىنان بەرى تاعى 8 پايىز قىمباتتادى.

«جىل باسىنان بەرى باعا اسىرەسە الماتى وبلىسىندا ەداۋىر كوتەرىلدى. مۇندا قىزمەت كورسەتۋ قۇنى 35,6 پايىز ءوستى. ال باتىس قازاقستان وبلىسىندا 29,8 پايىز، قوستاناي وبلىسىندا 25,2 پايىز كوتەرىلدى. ماڭعىستاۋ وبلىسىندا كەرىسىنشە باعا 1,5 پايىز تومەندەدى»، - دەپ حابارلادى ۇلتتىق ستاتيستيكا بيۋروسى.

الماتى وبلىسىندا كوبىنە تىنىس الۋ جولدارى مەن تىرەك- قيمىل جۇيەسى، تەرى جانە جۇرەك- قان تامىرلارى اۋرۋلارىنان ەمدەيدى. ەم-دوم كەزىندە بالشىق جانە كليماتتىق ەم قولدانىلادى.

الماتىداعى تاۋ كەشەنىندە ءتورت مەزگىل تاماق بەرەتىن، دارىگەر كەڭەسى مەن ەمى جۇرگىزىلەتىن ستاندارت نومىرلەر ءبىر ادامعا 21000 تەڭگە دەپ بەلگىلەنگەن. ال جارتىلاي ليۋكس قىزمەتى 22000 - 38500 تەڭگە ارالىعىندا. ال ليۋكس قىزمەتى 30000 تەڭگەدەن باستالىپ وسە بەرەدى. سونىمەن بىرگە ۋاقىتتى ءتيىمدى ءارى جايلى وتكىزگىسى كەلەتىن ادامدار VIP ءنومىردى تاڭداپ، تاۋلىگىنە 140000 تەڭگە تولەسە بولادى.

ماڭعىستاۋ وبلىسىنداعى شيپاجاي دا ەم جانە ساۋىقتىرۋ قىزمەتتەرىن ۇسىنادى. مۇندا جۇيكە جۇيەسى اۋرۋلارى، تىرەك- قيمىل، جۇرەك- قان تامىرلارى جانە اسقازان جۇيەسى اۋرۋلارىنا ەم ىزدەگەندەر بارا الادى. تەڭىز اۋاسى اسىرەسە تىنىس الۋ جولدارى اۋىراتىن ادامدارعا تاپتىرماس ەم. مۇندا قاراپايىم قىزمەت ءبىر ادامعا تاۋلىگىنە 18350 تەڭگە. ستاندارت نومىرلەر باعاسى 22300 تەڭگەدەن باستالادى. ال ودان ءتاۋىرى 25350 تەڭگەدەن باستالادى.

شۋچە- بۋراباي كۋرورتتىق ايماعىنىڭ تابيعاتى ەرەكشە كوز تارتادى. تازا اۋا، نۋ ورمان، سۋ ايدىنى ادامنىڭ جان دۇنيەسىنە تىنىشتىق سىيلايدى. مۇندا استما، پنيەۆمونيا سەكىلدى تىنىس الۋ جولدارى اۋرۋىنا شالدىققان ادامدار مەن جۇرەگى سىر بەرگەن ناۋقاستار ەم ىزدەپ كەلەدى. تىرەك- قيمىلى، اسقازان اۋرۋلارىنىڭ اسقىنعان ءتۇرىن دە وسىندا ەمدەتەدى. شيپاجايدا ەممەن قاتار فتيزيوتەراپيا، ماسساج، بالشىق پەن مينەرالدى سۋ بار.

ستاندارت نومىرلەرگە ءبىر ادام قونىستانسا تاۋلىگىنە 22000 تەڭگەدەن باستالادى. ال جارتىلاي ليۋكس 23000 تەڭگە، ليۋكس 45000 تەڭگە بولىپ تۇر. VIP- اپارتامەنت قۇنى 80000 تەڭگەدەن باستالادى.

سارىاعاشتا جەراستى ىستىق سۋى مەن مينەرالدى سۋ بار. بۇل تىنىس الۋ جانە بۋىن اۋرۋىنا قولدانىلادى. مۇندا تىرەك- قيمىل اۋرۋلارى، جۇيكە اۋرۋلارى مەن گينەكولوگيالىق دەرتكە شيپا ىزدەيتىن ادامدار بارادى.

ستاندارت نومىرلەردە تاماقتانۋ مەن ەم تۇرلەرى قاراستىرىلعان. بۇل قىزمەتتىڭ قۇنى 20000 تەڭگەدەن باستالادى. جارتىلاي ليۋكس 25000، ليۋكس 36000 تەڭگەدەن باستالادى. VIP- اپارتامەنت قۇنى 50000 - 120000 تەڭگە ارالىعىندا.

ەلىمىزدەگى شيپاجايلار ەمدەۋ-ساۋىقتىرۋ شارالارىنا قازاقى ەمدى دە قوسقانىن جازعان بولاتىنبىز.

اۆتور

التىناي ساعىندىقوۆا