قازاقستاندا ءسۇت بەزى ىسىگى ءورشىپ تۇر
الماتى. KAZINFORM - قازاقستاندا ءسۇت بەزى قاتەرلى ىسىگىنە شالدىققان ايەلدەردىڭ سانى ارتتى. 2023 -جىلى 5500 جاڭا جاعداي انىقتالدى.
بۇل تۋرالى «ونكورەنەسسانس-2024» مەديتسينالىق ونكولوگتاردىڭ ءبىرىنشى حالىقارالىق عىلىمي- پراكتيكالىق مەكتەبى اياسىندا وتكەن باسپا ءسوز ءماسليحاتىندا قازاق ونكولوگيا جانە راديولوگيا عىلىمي- زەرتتەۋ ينستيتۋتىنىڭ باسشىسى ديليارا قايداروۆا ايتتى.
سپيكەردىڭ سوزىنشە، 2023 -جىلدىڭ قورىتىندىسى بويىنشا 218 مىڭنان استام قازاقستاندىق ونكولوگيالىق ەسەپتە تۇر.
«بىلتىر 41515 قازاقستاندىققا ءتۇرلى قاتەرلى ىسىك دياگنوزى قويىلدى. ونىڭ 5500 ءى ءسۇت بەزى وبىرى. 2023 -جىلدىڭ قورىتىندىسى بويىنشا 218213 مىڭ ادام ونكولوگيالىق ەسەپتە تۇر. ءبىر جىل ىشىندە 13 مىڭعا جۋىق تۇرعىن وسى دەرتتەن قايتىس بولدى»، - دەيدى ديليارا قايداروۆا.
ەلدە ەڭ كوپ تارالعان تۇرلەرىنە ءسۇت بەزى وبىرى، كولورەكتالدى قاتەرلى ىسىك، جاتىر موينى وبىرى، اسقازان قاتەرلى ىسىگى مەن وكپە وبىرى جاتادى.
«ونكولوگيالىق اۋرۋ جىلدان-جىلعا جاسارىپ بارادى. بۇرىن اسقازان، ۇيقى بەزىنىڭ قاتەرلى ىسىگى 60 جاستان اسقان ادامداردان انىقتالسا، قازىر بۇل دەرت جاستار اراسىندا ءجيى كەزدەسە باستادى. ءبىزدىڭ مىندەتىمىز - حالىقتى ەمدەۋ جانە ەرتە دياگنوستيكا مۇمكىندىكتەرى تۋرالى اقپاراتتاندىرۋ. قازىر ساقتاندىرىلماعان ازاماتتار دا تەكسەرۋ كابينەتتەرىنەن تەگىن وتە الادى. بىزدە «جاسىل ءدالىز» بار، قاتەرلى ىسىككە كۇدىكتى ناۋقاستار بارلىق قىمبات تەكسەرۋلەردەن تەگىن وتەدى. ەڭ باستىسى ەمحاناعا كەلىپ تىركەلۋ كەرەك»، - دەپ ءتۇسىندىردى قازاقستاننىڭ باس ونكولوگى.
