قازاقستاندا بەنزين باعاسى قالاي وزگەرەدى - ەنەرگەتيكا مينيسترلىگى
استانا. KAZINFORM - ەلىمىزدە اي-92 جانارمايى مەن ديزەل وتىنىن قىمباتتاتۋعا ەنگىزىلگەن موراتوري اياقتالدى. ەنەرگەتيكا ۆيتسە-ءمينيسترى سۇڭعات ەسىمحانوۆ ەندى قانداي وزگەرىستەر بولادى دەگەن سۇراققا جاۋاپ بەردى.
- بۇعان دەيىن دە ەستە بولسا، جانار-جاعارماي نارىعى ەركىن اينالىمعا جىبەرىلگەن كەزدە باعا كۇرت وسكەن جوق. بۇل تەك ەنەرگەتيكا مينيسترلىگىنىڭ عانا ەمەس، باسەكەلەستىكتى قورعاۋ جانە دامىتۋ اگەنتتىگى، اكىمدىكتەر جانە باسقا دا مەملەكەتتىك ورگانداردىڭ بىرلەسكەن جۇمىسىنىڭ ناتيجەسى. ءبىز نارىقتى تۇراقتى باقىلاپ وتىرمىز، باسەكەگە قارسى ارەكەتتەرگە جول بەرمەۋگە تىرىسامىز، - دەدى سۇڭعات ەسىمحانوۆ ۇكىمەت ۇيىندە وتكەن باسپا ءسوز ماسىليحاتىندا.
ونىڭ ايتۋىنشا، جانارماي باعاسىندا كۇرت قىمباتتاۋ بولمايدى.
- باعا نارىق دەڭگەيىنە بىرتىندەپ بەيىمدەلۋى مۇمكىن. كورشى ەلدەردە جانارماي باعاسى الدەقايدا جوعارى ەكەنىن وزدەرىڭىز دە كورىپ وتىرسىزدار. سوندىقتان ازداپ، بىرتىندەپ ءوسۋى مۇمكىن، ءبىراق كۇرت قىمباتتاۋ بولمايدى دەپ ويلايمىن، - دەپ تولىقتىردى ۆيتسە-مينيستر.
ەسكە سالايىق، قازاقستاندا 1-ساۋىردەن باستاپ اي-92 بەنزينى مەن ديزەل وتىنى باعاسىنىڭ وسۋىنە ەنگىزىلگەن موراتوري ءوز كۇشىن جويدى.
بۇعان دەيىن «تۋريستىك قامقور» ۇيىمى تاياۋ شىعىستاعى شيەلەنىس پەن ورمۋز بۇعازىنداعى ىركىلىستەر الەم بويىنشا جانارماي باعاسىنىڭ قىمباتتاۋىنا اسەر ەتكەنىن ايتقان ەدى.
