قازاقستاندا بال باعاسى قانشا تۇرادى
كۇز كەلگەندە سۋىق ءتيىپ اۋىراتىندار كوبەيدى. مۇندايدا ادامدار كەيدە بال تۇتىنادى. تابيعي ءونىمنىڭ قازاقستان قالالارىنداعى قۇنى قانشا تۇرادى؟ Kazinform اگەنتتىگى سارالاپ كوردى.
قازاقستاندا التاي ولكەسىنىڭ بالى سۇرانىسقا يە. ەلىمىزدىڭ شىعىسى بال ءوندىرىسىنىڭ وتانى دەسەك تە بولادى. مۇندا قازاقستاندا وندىرىلەتىن بالدىڭ %70 شىعارىلادى. وسى ايماقتا بال باعاسى كەلىسىنە 2,5 مىڭ تەڭگەدەن باستالادى. ءقازىر ءبىز ەڭ كوپ تاراعان گۇل بالى تۋرالى سارالاپ وتىرمىز.
سەمەيدە دە ءدال وسى باعا ساقتالادى. سەبەبى سەمەي مەن وسكەمەن اراسى نەبارى 200 شاقىرىم. سونىمەن بىرگە پاۆلوداردا دا ءبىر كەلى بال باعاسى 2,5 مىڭ تەڭگە تۇرادى.
سولتۇستىككە قاراي بەت الساق، باعا كوتەرىلە بەرەدى. ەلىمىزدىڭ استاناسىندا باعا ورتا ەسەپپەن 3 مىڭ تەڭگەدەن باستالادى. ال قوستاناي مەن پەتروپاۆلدا بال باعاسى شامامەن 3200-3500 تەڭگە بولىپ تۇر.
وڭتۇستىككە قاراي جاعداي وزگەرەدى. بۇل سۇرانىسقا بايلانىستى بولۋى مۇمكىن. ماسەلەن الماتىدا بال باعاسى كەلىسىنە 3500-4000 تەڭگە بولىپ تۇر. ال شىمكەنت پەن تۇركىستاندا بالدىڭ كەيبىر سۇرپىن، ونىڭ ىشىندە ماقسارى بالىن 2500 تەڭگەگە ساتىپ الۋعا بولادى. ال وزگە بالدىڭ ورتاشا قۇنى 3000-3500 تەڭگە.
بال قۇنى ەلىمىزدىڭ باتىسىندا جوعارى. قالالار اراسىن سالىستىرعاندا، ايىرماشىلىق انىق بايقالادى. اتىراۋدا ورتا ەسەپپەن كەلىسى 3500 تەڭگە دەپ بەلگىلەنگەن. ال اقتاۋدا كەلىسى 7500-9000 تەڭگە. بۇل ەڭ جوعارى باعا.
ايتا كەتەيىك، جوكە، قاراقۇمىق سەكىلدى بالدىڭ وزگە تۇرلەرىنە باعا تاعى مىڭ تەڭگەگە وسەدى. شىمكەنتتە باعا كەلىسىنە 6 مىڭ تەڭگە بولىپ تۇر.
اۆتور
التىناي ساعىندىقوۆا
