قازاقستاندا 6-اقپان كۇنى دابىل سيرەنالارى ىسكە قوسىلادى
استانا. KAZINFORM - توتەنشە جاعدايلار مينيسترلىگى 6-اقپان كۇنى تاڭەرتەڭ ەلىمىزدىڭ كەيبىر وڭىرلەرىندە دابىل سيرەنالارى قوسىلاتىنىن ەسكەرتتى.
- «بارشانىڭ نازارىنا!» دابىلى بويىنشا اۋماقتىق دەڭگەيدەگى قۇلاقتاندىرۋ جۇيەسىنىڭ دايىندىعىن تەكسەرۋ ماقساتىندا 2025-جىلعى 6-اقپاندا، ساعات 11.00 دە بارلىق دىبىستىق ەلەكتر دابىلى قوسىلادى. وسىعان وراي تىنىشتىق ساقتاۋلارىڭىزدى جانە ۇرەيگە بوي الدىرماۋلارىڭىزدى سۇرايمىز، - دەلىنگەن ت ج م تاراتقان حابارلامادا.
سونىمەن قاتار 6-7-اقپاندا ەلىمىزدىڭ وڭتۇستىك جانە باتىس وڭىرلەرىندە «سۋ تاسقىنى كەزەڭى جاعدايلارىنداعى توتەنشە جاعدايلاردى جويۋ كەزىندەگى ءىس-قيمىلدارعا ازاماتتىق قورعاۋدىڭ مەملەكەتتىك جۇيەسىنىڭ باسقارۋ ورگاندارىن، كۇشتەرى مەن قۇرالدارىن دايىنداۋ» تاقىرىبى بويىنشا «كوكتەم-2025» رەسپۋبليكالىق كوماندالىق-شتابتىق وقۋ-جاتتىعۋدىڭ 1-كەزەڭى وتەدى.
وقۋ ۇيلەستىرۋ جانە جەتەكشىلىك ەتۋ جونىندەگى رەسپۋبليكالىق شتاب اتىراۋدا ورنالاسادى. وقۋ-جاتتىعۋ شەڭبەرىندە ەكى كۇن بويى الماتى، شىمكەنت قالالارىندا، الماتى، اتىراۋ، اقتوبە، باتىس قازاقستان، جامبىل، قىزىلوردا، ماڭعىستاۋ، تۇركىستان جانە جەتىسۋ وبلىستارىندا پروفيلاكتيكالىق ءىس-شارالار كەشەنى وتكىزىلەدى.
ەسكە سالساق، جەر سىلكىنگەندە الا شىعاتىن «دابىل شابادانىنا» نە سالۋ كەرەگى تۋرالى جازعان بولاتىنبىز.
