قازاقستاندا 14000 عا جۋىق التىن قۇيما ساتىلدى
استانا. قازاقپارات - 2024-جىلدىڭ III توقسانىندا ەكىنشى دەڭگەيلى بانكتەر مەن بانكتىك ەمەس جەكەلەگەن ايىرباستاۋ پۋنكتەرىندە جالپى سالماعى 475،5 كەلى 13940 التىن قۇيما ساتىلدى.
بۇل تۋرالى ۇلتتىق بانك مالىمدەدى.
حالىققا تازارتىلعان التىن قۇيمالاردى ساتۋ جانە ساتىپ الۋ باعدارلاماسىن (بۇدان ءارى - باعدارلاما) ۇلتتىق بانك 2017-جىلى ىسكە قوسقان بولاتىن. باعدارلاما قولعا الىنعالى جالپى سالماعى 7،4 توننا 199235 التىن قۇيما ساتىلدى.
التىن قۇيمالار بەس ءتۇرلى سالماقتا ۇسىنىلادى: 5، 10، 20، 50 جانە 100 گرام ساتىپ الۋشىلار اراسىندا وتە جوعارى سۇرانىسقا يە ءتۇرى - 10 گرامدىق التىن قۇيما. جالپى ساتىلعان قۇيمالار اراسىندا ونىڭ ۇلەسى 24 پايىز - 48629 دانا. ودان كەيىن 100 گرامدىق التىن قۇيما - 47227 دانا (24 پايىز)، 5 گرامدىق قۇيما - 44127 دانا (22 پايىز)، 20 گرامدىق قۇيما - 31612 دانا (16 پايىز)، جانە 50 گرامدىق قۇيما - 27640 دانا (14 پايىز).
2024-جىلعى III توقساندا التىن قۇيمالاردىڭ ەڭ كوپ بولىگى مىنا وڭىرلەردە ساتىلدى: الماتىدا (8101 دانا، 58 پايىز)، شىمكەنتتە (1279 دانا، 9 پايىز) جانە استانادا (1243 دانا، 9 پايىز).
التىن قۇيمالار سەنىمدى ينۆەستيتسيا قۇرالى بولا الادى. التىن قۇيمالار نارىعىنداعى وتىمدىلىكتىڭ باستى كەپىلى - بانك پەن بانكتىك ەمەس ايىرباستاۋ پۋنكتەرى كليەنتكە اقشانى سول كۇنى تولەي وتىرىپ، التىن قۇيمالاردى كەرى ساتىپ الا الادى.
باعدارلاما جۇزەگە اسقالى ەكىنشى دەڭگەيلى بانكتەر مەن بانكتىك ەمەس جەكەلەگەن پۋنكتەر جالپى سالماعى 1،1 توننا 41 058 التىن قۇيمانى كەرى ساتىپ العان. بۇل - جالپى ساتىلعان التىن قۇيمالاردىڭ 21 پايىزى. ولار كەرى ساتىپ الۋعا قابىلداعان ولشەمەلى قۇيمالاردىڭ بارلىعى حالىققا ۇلتتىق بانكتىڭ فيليالدارىنا كەرى تاپسىرۋسىز ساتىلادى.
«ءاربىر قۇيما قورعاۋ ەلەمەنتتەرىمەن قاپتالعان (قۇيمانىڭ اينا بەتى، ميكروتەكست جانە بەدەرلى جيەگى بار) جانە مەحانيكالىق زاقىمدانۋدان قورعايتىن ارنايى قوراپقا سالىنىپ شىعادى. سول ارقىلى قۇيمانىڭ اشىلعان-اشىلماعانىن وڭاي تەكسەرۋگە بولادى. قورعاپ تۇراتىن قوراپ سونداي-اق ساپا سەرتيفيكاتى بولىپ سانالادى. سوندىقتان، التىن قۇيمانى ۇقىپتى ساقتاپ، قورابىن بۇلدىرمەۋگە كەڭەس بەرەمىز. قازىر التىن قۇيمالاردى ءبىرقاتار ەكىنشى دەڭگەيلى بانكتەردە، سونداي-اق بانكتىك ەمەس جەكەلەگەن پۋنكتەردەن ساتىپ الىپ، كەرى ساتۋعا بولادى»، - دەلىنگەن ۇلتتىق بانك حابارلاماسىندا.
بۇعان دەيىن ۇلتتىق بانك ءتوراعاسى تيمۋر سۇلەيمەنوۆ تەڭگە باعامىن قولداۋ ءۇشىن ىشكى نارىققا دوللار ساتۋ قالاي ۇيىمداستىرىلىپ جاتقانىن ءمالىم ەتكەن بولاتىن.
