قازاقستاندا 10 مىڭ جۇمىسشىعا 7 روبوتتان كەلەدى - مينيستر مۇنى تومەن كورسەتكىش دەپ اتادى
استانا. KAZINFORM - قازاقستاننىڭ ماشينا جاساۋ سالاسى جاڭا كەزەڭگە قادام باستى: وندىرىستەردە روبوتتاندىرۋ قارقىن الىپ، جاساندى ينتەللەكت پەن سيفرلىق شەشىمدەر بەلسەندى ەنگىزىلىپ كەلەدى. دەگەنمەن، ەلدەگى روبوتتاندىرۋ دەڭگەيى ءالى دە تومەن - 10 مىڭ جۇمىسشىعا نەبارى 7 روبوتتان كەلەدى. بۇل تۋرالى ۇكىمەت وتىرىسىندا ونەركاسىپ جانە قۇرىلىس ءمينيسترى ەرسايىن ناعاسپايەۆ ايتتى.
ونىڭ ايتۋىنشا، ماشينا جاساۋ سالاسىنداعى يننوۆاتسيانى دامىتۋدىڭ باستى باعىتتارىنىڭ ءبىرى - ءوندىرىستى روبوتتاندىرۋ.
- قازىردە ەلىمىزدە 10 مىڭ جۇمىسشىعا 7 روبوتتان كەلەدى، بۇل دامىعان ەلدەردەن الدەقايدا تومەن. وسىعان بايلانىستى وندىرىستە روبوتتاندىرۋدى دامىتۋ جانە كادر تاپشىلىعىن ازايتۋ ماقساتىندا سيفرلىق شەشىمدەردى ەنگىزۋ جۇمىستارى بەلسەندى جۇرگىزىلۋدە. ونىڭ ىشىنە اۆتوماتتاندىرىلعان ءوندىرىستى باسقارۋ جۇيەسى، دەرەكتەردى تالداۋ، جاساندى ينتەللەكت، سيفرلىق پلاتفورمالار، ونەركاسىپتىك روبوتتار مەن machine vision جۇيەلەرى كىرەدى، - دەدى ونەركاسىپ ءمينيسترى.
وتكەن جىلى وندىرىستەردە FANUC جانە ABB روبوتتارىن قوسا ەسەپتەگەندە 300 دەن استام روبوت ورناتىلعان.
مىسال رەتىندە KIA Qazaqstan زاۋىتىندا 68 روبوت، Astana Motors-تا 54 روبوت جۇمىس ىستەيدى.
سونىمەن بىرگە، جاساندى ينتەللەكت جانە سيفرلىق دامۋ مينيسترلىگىمەن بىرلەسىپ، «Digital Kazakhstan» جالپىۇلتتىق ستراتەگياسى اياسىندا ەكونوميكا سالالارىن روبوتتاندىرۋ بويىنشا جوبالىق وفيس قۇرۋ جوسپارلانىپ وتىر.
ايتا كەتەيىك، ەلدەگى كاسىپورىنداردىڭ يننوۆاتسياعا جۇمساعان شىعىنى ءتورت جارىم ەسەگە ءوسىپ، 1,9 تريلليون تەڭگەگە جەتتى. تەرەڭدە ورنالاسقان، ءداستۇرلى ادىستەرمەن انىقتالمايتىن جاسىرىن كەن ورىندارىن ىزدەۋ ءۇشىن يننوۆاتسيالىق گەوحيميالىق ءادىس ەنگىزىلىپ جاتىر.
سوڭعى بەس جىلدا تاۋ-كەن سالاسىنىڭ ءىرى كاسىپورىندارى عىلىمي- زەرتتەۋ جانە تاجىريبەلىك- كونسترۋكتورلىق جۇمىستارعا 150 ميلليارد تەڭگە ينۆەستيتسيا سالىپ، 1,5 مىڭنان استام جوبانى ىسكە اسىرعان.
