قازاقستانعا كۋبا بوكسشىلارى كەلدى

قازاقستانعا بوكستان كۋبانىڭ ەرلەر قۇراماسى كەلدى. باستى ماقسات - قازاقستان بوكسشىلارىمەن بىرلەسكەن وقۋ-جاتتىعۋ جيىنىنا جانە عالىم جارىلعاپوۆتى ەسكە الۋعا ارنالعان حالىقارالىق تۋرنيرگە قاتىسۋ، دەپ حابارلايدى Kazinform ق ب ف باسپا ءسوز قىزمەتىنە سىلتەمە جاساپ.

قوناقتار قاتارىندا بارلىعى 9 بىلعارى قولعاپ شەبەرى مەن ەكى جاتتىقتىرۋشى بار. ولاردىڭ اراسىندا الەم چەمپيوناتىنىڭ جانە پانامەريكالىق چەمپيوناتتىڭ قازىرگى فيناليستەرى، كوپتەگەن حالىقارالىق تۋرنيرلەردىڭ جەڭىمپازدارى مەن جۇلدەگەرلەرى بار. نەگىزگى ەكپىن وليمپيادالىق سالماققا اۋدارىلعان. كۋبا قۇراماسىنىڭ باس باپكەرى كارلوس مانۋەل پەرەس رەيەستىڭ ايتۋىنشا، ونىڭ بوكسشىلارىنىڭ اراسىندا تاجىريبەلى سپورتشىلار دا، جاستار دا كەزدەسەدى.

«ءبىز قازاقستانعا ءبىرىنشى رەت كەلگەن جوقپىز. بىزدە بوكستا ەلدەر اراسىندا جاقسى دوستىق قالىپتاسقان. سوندىقتان، كوماندامىزبەن بىرلەسكەن وقۋ-جاتتىعۋ جيىنىن وتكىزۋ، سونىمەن قاتار عالىم جارىلعاپوۆتى ەسكە الۋعا ارنالعان ءداستۇرلى تۋرنيردە ءوز ونەرلەرىمىزدى كورسەتۋ تۋرالى شەشىم قابىلدادىق. مەن ءوز اتىمنان جانە كۋبا قۇراماسىنىڭ اتىنان بەلگىلى تۇلعالارىڭىزدىڭ قۇرمەتىنە ارنالعان جارىسقا شاقىرعاندارىڭىز ءۇشىن العىسىمدى بىلدىرگىم كەلەدى جانە بارلىعى ناتيجەلى بولادى دەپ سەنەمىن»، - دەدى كۋبالىق بوكس باپكەرى ءوز سۇحباتىندا.

قازاقستان قۇراماسىنىڭ باس باپكەرى مىرزاعالي ايتجانوۆتىڭ تاربيەلەنۋشىلەرى مەن بوستاندىق ارالىنان كەلگەن قوناقتاردىڭ قاتىسۋىمەن قاراعاندى قالاسىندا 4-16- جەلتوقسان ارالىعىندا وقۋ-جاتتىعۋ جيىنى وتەدى.

17- جەلتوقساندا قاراعاندىدا قازاق ك س ر ەڭبەك سىڭىرگەن جاتتىقتىرۋشىسى عالىم جارىلعاپوۆتى ەسكە الۋعا ارنالعان ХХХІХ حالىقارالىق تۋرنير باستالادى. ەرلەر مەن ايەلدەر اراسىنداعى ۇزدىكتەر 21- جەلتوقساندا انىقتالادى.

اۆتوركۇنسۇلتان وتارباي