قازاقستان وزبەكستانعا شىعاراتىن ەكسپورتتى 550 ميلليون دوللارعا ارتتىرا الادى
استانا. KAZINFORM - قازاقستان وزبەك ەلىنە ۇن، بيداي جانە وزگە دە ازىق- تۇلىك ونىمدەرىن ەكسپورتتاۋدى جالعاستىرا بەرەدى.
بۇل تۋرالى اقوردادا وزبەكستان پرەزيدەنتى شاۆكات ميرزيەيەۆپەن كەلىسسوزدەردەن كەيىنگى ب ا ق وكىلدەرىنە ارنالعان بريفينگتە مەملەكەت باسشىسى قاسىم- جومارت توقايەۆ ايتتى.
«ساپار اياسىندا جوعارى مەملەكەتارالىق كەڭەستىڭ العاشقى وتىرىسى ءوتتى. وندا قابىلدانعان شەشىمدەردىڭ ستراتەگيالىق ماڭىزى وتە زور. كەڭەس بارىسىندا قازاق- وزبەك ىنتىماقتاستىعىنىڭ وزەكتى ماسەلەلەرى جونىندە پىكىر الماستىق. ءوزارا سەرىكتەستىكتى نىعايتا ءتۇسۋدىڭ ءتيىمدى جولدارىن ايقىندادىق. ناقتى كەلىسىمدەرگە قول جەتكىزدىك. اتاپ ايتقاندا، ەكونوميكالىق بايلانىستاردى كۇشەيتۋگە كەلىستىك»، - دەدى مەملەكەت باسشىسى.
قاسىم-جومارت توقايەۆ قازاقستان مەن وزبەكستان ورتالىق ازياداعى ساۋدا-ساتتىق بويىنشا ەڭ ءىرى سەرىكتەستەر ەكەندىگىنە توقتالدى.
«بىلتىر ءوزارا تاۋار اينالىمى 4,4 ميلليارد دوللارعا جەتتى. ءبىز بۇل كورسەتكىشتى تاياۋ ارادا 5، كەيىن 10 ميلليارد دوللارعا دەيىن جەتكىزۋ ماقساتىن تاعى دا اتاپ كورسەتتىك. ول ءۇشىن الىس-بەرىستەگى تاۋار تۇرلەرىن كوبەيتۋىمىز كەرەك. سونداي- اق ەكونوميكالىق ىقپالداستىقتى تەجەيتىن كەدەرگىلەردى جويۋ قاجەت. جالپى، ساۋدا-ساتتىقتىڭ اۋقىمىن كەڭەيتۋگە ەكى ەلدىڭ دە مۇمكىندىگى مول. قازىردىڭ وزىندە وزبەكستانعا شىعاراتىن ەكسپورتتى 550 ميلليون دوللارعا ارتتىرا الامىز. ياعني، وندىرىلگەن تاۋاردىڭ تاعى 40 ءتۇرى بويىنشا ەكسپورت جاساۋعا مۇمكىندىك بار. وزبەك ەلى دە قازاقستانعا كوپتەگەن ونىمدەرىن جىبەرىپ وتىر»، - دەدى مەملەكەت باسشىسى.
پرەزيدەنت بۇدان بولەك، اۋىل شارۋاشىلىعى سالاسىنداعى ىنتىماقتاستىق ماسەلەسى تالقىلانعانىن ايتتى.
«بىلتىر وسى سالاداعى تاۋار اينالىمى 1,7 ميلليارد دوللارعا جەتتى. بۇل جالپى ساۋدا- ساتتىقتىڭ شامامەن ۇشتەن ءبىر بولىگى دەگەن ءسوز. ەلىمىز الەۋمەتتىك ماڭىزى جوعارى اگروونەركاسىپ ونىمدەرىن وزبەكستاننان يمپورتتاۋعا مۇددەلى. سونىمەن قاتار وزبەك ەلىنە ۇن، بيداي جانە وزگە دە ازىق-تۇلىك ونىمدەرىن ەكسپورتتاۋدى جالعاستىرا بەرەمىز. ءبىز ۇكىمەتارالىق كەڭەسپەن عانا شەكتەلىپ قالمايمىز. ءتۇرلى دەڭگەيدەگى جان-جاقتى ىقپالداستىقتى جانداندىرا تۇسەمىز»، - دەدى قاسىم-جومارت توقايەۆ.
