قازاقستان تەرروريزم قاۋپى ەڭ تومەن ەلدەردىڭ قاتارىندا - جاھاندىق يندەكس
تاشكەنت. KAZINFORM - ەكونوميكا جانە بەيبىتشىلىك ينستيتۋتى ازىرلەگەن جاھاندىق تەرروريزم يندەكسىندە قازاقستان 100-ورىنعا جايعاستى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ينستيتۋتتىڭ زەرتتەۋىنە سايكەس، ورتالىق ازياداعى ءۇش مەملەكەت، اتاپ ايتقاندا قازاقستان (0 بال)، قىرعىزستان (0 بال) جانە تۇرىكمەنستان (0 بال) تەرروريزم قاۋىپى وتە تومەن ەلدەردىڭ قاتارىندا.
بۇل رەتتە كورشىلەس وزبەكستان - 90 (0,233 بال)، ال تاجىكستان 70-ورىنعا (0,999 بال) تۇراقتادى. يندەكستى قالىپتاستىرۋ تارتىبىنە ساي، نەعۇرلىم ەلدەر كەيىنگى ورىندارعا جايعاسسا، سوعۇرلىم ول مەملەكەتتەگى تەرروريزم قاۋىپى تومەن دەپ باعالانادى.
زەرتتەۋ دەرەكتەرىنە سايكەس، رەسەي (16-ورىن) تەرروريزم قاۋىپى جوعارى ەلدەر قاتارىندا. بەلارۋس پەن ازەربايجان 90-ورىندا بولسا، ارمەنيا 79-ورىنعا تۇراقتاعان.
العاشقى ۇشتىككە بۋركينا-فاسو، پاكىستان جانە سيريا ەنىپ وتىر. جالپى، ساراپشىلار ءوز بايانداماسىندا اتاپ وتكەندەي، تەرروريزم ءالى دە باستى قاۋىپتەردىڭ ءبىرى بولىپ قالا بەرەدى.
- ەۋرازيادا ءبىر جىلدا 18 تەررورلىق شابۋىل بولىپ، سالدارىنان 199 ادام قازا تاپتى. بۇل 2010 -جىلدان بەرى تىركەلگەن ەڭ جوعارى كورسەتكىش، - دەلىنگەن ەكونوميكا جانە بەيبىتشىلىك ينستيتۋتىنىڭ بايانداماسىندا.
ەسكە سالايىق، بۇعان دەيىن ۇلى بريتانيا بارلاۋ قىزمەتىنىڭ بۇرىنعى باسشىسى دجون سويەرس يزرايل ارمياسىنىڭ حاماس جەتەكشىسى ياحيا سينۆاردى ءولتىرۋى رەسمي لوندوندا لاڭكەستىك ارەكەتتەردىڭ كۇشەيۋىنە اكەلۋى مۇمكىن ەكەنىن ەسكەرتتى.
قوسا كەتسەك، تاياۋدا الەۋمەتتىك جەلىدە تەرروريزمدى ناسيحاتتادى دەگەن كۇدىكپەن 4 قازاقستاندىق ۇستالعان بولاتىن.
اۆتور
ءاليحان اسقار
