قازاقستان قالالارىنداعى اۆتوبۋس جولاقىسىنىڭ قۇنى قانشا
ەلىمىزدە قوعامدىق كولىك جولاقىسى تۇراقتى. قازىرگى كەزدە وزگە وڭىرلەرگە قاراعاندا تۇركىستان، شىمكەنت پەن اقتاۋ قالالارىندا باعا تومەن دەپ حابارلايدى Kazinform اگەنتتىگىنىڭ ءتىلشىسى.
قوعامدىق كولىك جولاقىسىنىڭ ءتاريفىن جەرگىلىكتى اكىمدىك بەكىتەدى. تاسىمالداۋشى كاسىپورىن شىعىنىنىڭ ءبىر بولىگى سۋبسيديالانىپ، قولداۋ كورسەتىلىپ وتىرادى. سوندىقتان كەيبىر وڭىردە جەرگىلىكتى اكىمدىك ءبىرقاتار جەڭىلدىك جاساپ، تەگىن جۇرەتىن ساناتتار قاتارىن انىقتايدى.
ەلىمىز بويىنشا تۇركىستان، اقتاۋ مەن شىمكەنت قالالارىندا كارتا جانە ونلاين تولەسە، ءبىر ادامعا - 70 تەڭگە. تۇركىستاندا جولاقىنى قولما-قول تولەسە - 100 تەڭگە، اقتاۋدا - 150 تەڭگە. بۇل قالالارىندا وقۋشىلار جولاقىنىڭ تەڭ جارتىسىن عانا تولەيدى.
شىمكەنت قالاسىندا تاريف 2016 -جىلدان بەرى كوتەرىلمەدى. قازىرگى كەزدە جولاقىنى 120 تەڭگەگە ءوسىرۋ ءۇشىن تالقىلاۋ ءجۇرىپ جاتىر. جەرگىلىكتى اكىمدىك تاريف كوتەرىلسە دە جەڭىلدىك قولدانىپ جۇرگەن جولاۋشىلار ساناتىن ساقتاپ قالماق نيەتتە.
تالدىقورعان، سەمەي، جەزقازعان، اتىراۋ مەن اقتاۋدا جولاقى ءتاريفى ءسال جوعارى. ونلاين تولەسە - 80 تەڭگە. ال قولما-قول تولەسە تالدىقورعاندا - 120 تەڭگە، اقتوبەدە - 150 تەڭگە، سەمەي قالاسىندا - 140 تەڭگە. وقۋشىلار كارتا ارقىلى جولاقىسىنىڭ تەڭ جارتىسىن تولەسە، قولما-قول جانە ونلاين 80 تەڭگە بەرەدى.
اقتوبەدە جەڭىلدىك ساناتىنا جاتاتىن جولاۋشىلار تەگىن جۇرەدى، ال اتىراۋدا جولاقىسىنىڭ %50 ىن تولەيدى. ءبىر ارتىقشىلىعى مۇندا مەكتەپ وقۋشىلارىنا ساباق باستالعاندا ولاردىڭ تەگىن جۇرۋىنە مۇمكىندىك جاسالعان. ال ستۋدەنتتەر مارشرۋتتا كۇنىنە ەكى رەت تەگىن قاتىنايدى. ياعني ساباققا تەگىن بارىپ- كەلۋىنە بولادى.
جەزقازعاندا كوپبالالى وتباسى بالالارى قوعامدىق كولىكتە تەگىن جۇرەدى. قىزىلوردادا جولاۋشىلار تاسىمالداۋشى كومپانيانىڭ سۋبسيديا الاتىن مارشرۋتىنا ەرەسەكتەر 85 تەڭگە، بالالار 40 تەڭگە تولەيدى. ال جەكە مارشرۋتتاردا جولاقى - 100 تەڭگە.
وسكەمەندە كارتامەن ەسەپ ايىرىسسا 90 تەڭگە، قولما-قول 130 تەڭگە دەپ بەكىتتى. ال بالالار قوعامدىق كولىكتە تەگىن جۇرەدى.
ەلىمىز بويىنشا كوپ قالادا جولاقى - 100 تەڭگە. ورال، پەتروپاۆل، پاۆلودار، قوستاناي، كوكشەتاۋ مەن تارازداعى تاريف وسى.
ورالدا قولما-قول تولەسە، بيلەت قۇنى - 200 تەڭگە. وقۋشىلار مەن جەڭىلدىك ساناتىنا كىرەتىن ادامدار اۆتوبۋستا جولاقىعا 50 تەڭگە تولەيدى.
تارازدا جولاقى تاريفى بيىل وزگەردى. مۇندا قولما-قول ەرەسەكتەرگە 130 تەڭگە، وقۋشىلارعا 65 تەڭگە. ال كارتا ارقىلى تولەسە - 50 تەڭگە.
كوكشەتاۋدا وقۋشىلار جولاقىسىنا 40 تەڭگە تولەيدى. وقۋشىلارعا قولما-قول - 70 تەڭگە، ەرەسەكتەرگە - 150 تەڭگە. زەينەتكەرلەر ارنايى كولىك كارتاسىن قولدانسا تەگىن جۇرە الادى.
قوستانايدا تاريف ءسال جوعارى. ەرەسەكتەر قوعامدىق كولىكتە قولما-قول ەسەپ ايىرىسسا 170 تەڭگە تولەيدى. ال زەينەتكەرلەر 90 تەڭگە، 7 جاستان اسقان بالالارعا - 50 تەڭگە (قولما-قول ەرەسەكتەرگە - 160 تەڭگە، بالالارعا - 75 تەڭگە). 7 جاسقا تولماعان بالالار مەن جەڭىلدىك ساناتىنا كىرەتىن ادامدار تەگىن قاتىنايدى.
پەتروپاۆلدا ەرەسەكتەر 170 تەڭگە، ال بالالار 85 تەڭگە تولەيدى. بۇل ءۇشىن جۇرگىزۋشىگە اقشا بەرەدى، ال جۇرگىزۋشى بيلەت راسىمدەيدى. بالالار كارتا ارقىلى 50 تەڭگە تولەۋگە مىندەتتى.
پاۆلوداردا ەرەسەكتەر قولما-قول 200 تەڭگە تولەيدى. قوستانايلىق زەينەتكەرلەرگە جەڭىلدىك قاراستىرىلعان. مۇندا وقۋشىلار قوعامدىق كولىكتە تەگىن ءجۇرۋ قۇقىعىنا يە.
استانادا ەرەسەكتەر جولاقىسىنا 110 تەڭگە تولەيدى. جەڭىلدىك ساناتىنا كىرەتىن جولاۋشىلار مەن 7 جاسقا تولماعان بالالار، سونىمەن بىرگە مەكتەپ وقۋشىلارى مەن كوللەدج ءبىلىم الۋشىلارى تەگىن قاتىنايدى. وقۋشىلار مەن كوللەدج ءبىلىم الۋشىلارى قوعامدىق كولىك كارتاسىن وزىمەن بىرگە الىپ ءجۇرۋى ءتيىس. سونىمەن بىرگە قالادا اكسيا ۇيىمداستىرىلىپ تۇرادى. كەيبىر مەرەكە كۇندەرى قوعامدىق كولىك تەگىن قىزمەت كورسەتەدى. جەرگىلىكتى اكىمدىك الدىن الا حابارلاما تاراتادى.
ەلىمىز بويىنشا الماتى، قاراعاندى مەن قونايەۆ قالالارىندا جولاقى ءتاريفى جوعارى. كارتا ارقىلى - 120 تەڭگە.
قاراعاندىدا قولما-قول تولەسە 250 تەڭگە تولەيدى. بۇل قالادا 18 جاسقا دەيىنگى بالالار قوعامدىق كولىكتە تەگىن جۇرەدى.
قونايەۆتا قوعامدىق كولىك تاريفى بيىل قايتا بەكىتىلدى. جولاۋشى بيلەتكە قولما- قول تولەسە جولاقى - 200 تەڭگە.
الماتىدا وقۋشىلار، ستۋدەنتتەر مەن جەڭىلدىك ساناتىنا كىرەتىن جولاۋشىلار 60 تەڭگە تولەيدى. قولما-قول تولەۋ نەمەسە جۇرگىزۋشى ەسەپشوتىنا اۋدارۋ مۇلدە قاراستىرىلماعان. باقىلاۋشىلار مۇنى مۇلدە قابىلدامايدى. قالا تۇرعىندارىنىڭ كوبى اقشا ۇنەمدەۋ ءۇشىن ارنايى كارتا ساتىپ الادى. ەرەسەكتەرگە - 9900 تەڭگە، ستۋدەنتتەرگە - 4200 تەڭگە، وقۋشىلارعا – 2000، زەينەتكەرلەرگە - 3000 تەڭگە. كوپبالالى وتباسى بالالارى اۆتوبۋستا تەگىن جۇرەدى.
اۆتور
التىناي ساعىندىقوۆا
