قازاقستان قالالارىندا تاكسي قىزمەتى تاريفىنىڭ قانداي ايىرماشىلىعى بار
كۇن سايىن جۇزدەگەن مىڭ قازاقستاندىق تاكسي قىزمەتىنە جۇگىنەدى. كەيبىر ادامدار ءۇشىن بۇل قىمبات، ال ەندى بىرىنە قالىپتى قىزمەت ءتۇرى. Kazinform اگەنتتىگى ايماقتارداعى باعانى سالىستىرىپ كوردى.
قازاقستان ايماقتارىندا تاكسي قىزمەتىن ۇسىناتىن تاسىمالداۋشىلار ءارتۇرلى، سايكەسىنشە باعا دا وزگەرىپ وتىرادى. ولاردىڭ موبيلدى قوسىمشاسى جۇمىس ىستەپ تۇر. ەڭ تانىمالى ءارى سۇرانىسى جوعارىسى - ياندەكس Go. كومپانيانىڭ رەسمي سايتىنا سۇيەنىپ تاكسي قىزمەتىنىڭ قۇنىن سارالاپ كوردىك. ءبىر شاقىرىمنىڭ ەڭ تومەنگى تاريفى نازارعا الىندى. ياعني سۇرانىس جوعارى بولاتىن قىم- قۋىت شاق، جاڭبىر مەن ءتۇرلى جاعدايلاردان وزگە كەزدەگى باعا سارالاندى. تاريفى ەڭ تومەن قالا ول تاراز شاھارى بولىپ شىقتى. مۇندا ءار شاقىرىمىنا 220 تەڭگە سۇرايدى. ال قارا سىرتىنا شىعۋ قاجەت بولسا ءار شاقىرىمىنا تاعى 120 تەڭگە قوسۋ كەرەك بولادى. ەكىنشى ورىندا قىزىلوردا مەن تۇركىستان قالالارى تۇر. مۇندا ءار شاقىرىمى شامامەن 230 تەڭگەدەن باستالادى. ال قالا سىرتىنا قاتىناۋ ءۇشىن بىرىنشىسىنە تاعى 160 تەڭگە، ەكىنشىسىنە 130 تەڭگە قوسىپ تولەۋگە تۋرا كەلەدى.
تىزىمدەگى كەلەسى قالالار - قوستاناي مەن اقتوبە. مۇندا ەكونوم- كلاسس قىزمەتى شاقىرىمىنا 270 تەڭگە دەپ كورسەتىلگەن. قالا ماڭىنا قاتىناۋ ءۇشىن قوستانايدا 150 تەڭگە، اقتوبەدە 170 تەڭگە قوسا تولەۋ قاجەت. كەلەسى قالالاردا باعا الدىڭعىعا قاراعاندا 10 تەڭگەگە جوعارى. ولار تالدىقورعان، اقتاۋ جانە پەتروپاۆل قالالارى. مۇندا ءبىر شاقىرىم قۇنى 280 تەڭگەدەن باستالادى. ەگەر بۇل قالالاردىڭ تۇرعىندارى مەن قوناقتارى قالا ماڭىنا بارعىسى كەلسە 150، 180 جانە 190 تەڭگە قوسىمشا تولەۋى ءتيىس.
سونىمەن بىرگە شىمكەنت جانە پاۆلودار قالالارىندا تاكسي قىزمەتىنىڭ قۇنى شاقىرىمىنا 290 تەڭگەدەن باستالادى. ونىڭ ءبىرى ميلليون تۇرعىنى بار قالا، ال ەكىنشىسى حالىق سانى ودان ءتورت ەسە از شاھار. پاۆلوداردا قالا سىرتىنا بارۋ ءۇشىن 170، ال شىمكەنتتە شاقىرىمىنا 120 تەڭگە كورسەتىپ تۇر. ورال مەن سەمەي قالالارىندا تاكسي قىزمەتىنىڭ تاريفى 300 تەڭگەدەن باستالادى. ال قالا سىرتىنا قاتىناۋ قۇنى 180 تەڭگەدەن جوعارى. ودان ءارى اتىراۋ مەن قاراعاندى قالالارى تۇر. مۇندا ءبىر شاقىرىم ءۇشىن قىزمەت تاريفى 320 تەڭگە. ءبىر قىزىعى اتىراۋدا قالا سىرتىنا تاسىمالداۋ قۇنى ەلىمىز بويىنشا ەڭ ارزانى. مۇندا شاقىرىمىنا 100 تەڭگە قوسىلادى. ال قاراعاندىدا ورتا ەسەپپەن 150 تەڭگە تولەيدى.
ءارى قاراي جەزقازعان قالاسى تۇر. مۇنا ءار شاقىرىمىنا 330 تەڭگە ەسەپتەلەدى. ال قالا سىرتىنا تاسىمالداۋ قۇنى 140 تەڭگە دەپ كورسەتىلگەن. سوڭىنان باستاعاندا ءۇشىنشى تۇرعانى - كوكشەتاۋ قالاسى. مۇندا تاريف 350 تەڭگەدەن باستالادى. ال قالا سىرتىنا بارا قالساڭىز ءار شاقىرىمىنا قوسىمشا 130 تەڭگە ەسەپتەلەدى.
وسكەمەندە باعا وزگە وڭىرلەرگە قاراعاندا جوعارى. مۇندا تاكسي قىزمەتىنىڭ قۇنى شاقىرىمىنا 370 تەڭگەدەن باستالادى. ال قالا سىرتىنا تاسىمالداۋ قۇنى 220 تەڭگەدەن باستالىپ، جوعارىلاي بەرەدى.
ال ءبىرىنشى ورىندا استانا مەن الماتى قالالارى تۇر. مۇندا تاكسي قىزمەتىنە سۇرانىس جوعارى ءارى باعا 400 تەڭگەدەن باستالادى. سولتۇستىك جانە وڭتۇستىك استانامىزداعى قالا سىرتىنا جەتۋ قۇنى 130 تەڭگەدەن جوعارى.
ايتا كەتەيىك، قازاقستاننىڭ بارلىق قالاسىندا «ەكونوم» تاريف بار. سونىمەن بىرگە كەيبىر قالالاردى پرەميۋم، جەتكىزۋ، كۋرەر جانە بىرگە بارۋ قىزمەتتەرى تۇگەلى «كومفورت» قىزمەتىنىڭ ءوزىن قاراستىرىلماعان.
