قازاقستان نە ءۇشىن سىرتتان قارىز الادى - پرەمەر-مينيستر جاۋابى

استانا. KAZINFORM - قازاقستان نەگە سىرتتان قارىز الادى؟ ەلىمىزدىڭ قازىر قانشا قارىزى بار؟ بۇل ساۋالدارعا ۇكىمەت باسشىسى ولجاس بەكتەنوۆ جاۋاپ بەردى.

- شىن مانىندە، جالپى ىشكى ءونىمنىڭ 21,1 پايىز مولشەرىندە مەملەكەتتىك قارىزدىڭ بولۋى قالىپتى. حالىقارالىق ستاندارتتار بويىنشا بۇل تومەن كورسەتكىش. كوپتەگەن ەلدە ەكونوميكا بويىنشا مەملەكەتتىك قارىزدىڭ دەڭگەيى ج ءى ءو- نەن 100 پايىزدان دا اسادى. ەكونوميكاسى ءىرى ەۋروپا ەلدەرىندە شامامەن 80 پايىز دەڭگەيىندە، ال بىزدە بۇل كورسەتكىش - 21 پايىز، - دەدى ولجاس بەكتەنوۆ ۇكىمەت ۇيىندە وتكەن باسپا ءسوز ءماسليحاتىندا.

ودان ءارى پرەمەر-مينيستر مەملەكەت نە سەبەپتى قارىز الاتىنىن ءتۇسىندىردى.

- حالىقارالىق قارجى ۇيىمدارىنان قارىز الۋ، بەلگىلى ءبىر سالاعا شوعىرلانعان ينۆەستيتسيا سالۋعا مۇمكىندىك بەرەدى. مىسالى، قازىر ءبىز يسلام دامۋ بانكىمەن جۇمىس ىستەپ جاتىرمىز. ماقسات - سۋ شارۋاشىلىعى ينفراقۇرىلىمىن دامىتۋ، ياعني سۋ قويمالارى، كانالدار جانە تاعى باسقا نىسانداردى جاڭعىرتۋعا نەسيە الىپ جاتىرمىز. اتالعان جوباعا 1 ميلليارد دوللاردان استام قاراجات قاراستىرىلعان. ارينە، بۇل پروبلەمانى رەسپۋبليكالىق بيۋجەت ەسەبىنەن دە شەشۋگە بولار ەدى، جىل سايىن مۇمكىندىگىمىزگە قاراي قارجى ءبولىپ، ينفراقۇرىلىمدى 10-20 جىلدا سالار ەدىك. ءبىراق ءتيىمدى شارتتارمەن قارجى تارتىپ، ينفراقۇرىلىمدى بىردەن سالىپ الۋ الدەقايدا ءتيىمدى. كەيىن بيۋدجەتتەن نەسيەنى پايىزدارىمەن بىرگە بىرتىندەپ وتەيمىز. پايىز مولشەرلەمەسى - شامامەن 3 پايىز دوللارمەن ەسەپتەگەندە، بۇل نارىقتاعى قالىپتى، قولايلى شارت، - دەپ ءتۇسىندىردى ول.

ولجاس بەكتەنوۆتىڭ ايتۋىنشا، سىرتتان قارىزدى ەلدىڭ قارجىلىق جاعدايى ناشار بولعاندىقتان المايدى، بۇل - حالىقارالىق قالىپتى تاجىريبە.

- كەز كەلگەن كومپانيا بەلگىلى ءبىر جوبانى قارجىلاندىرۋ ءۇشىن نەسيە الادى، كەيىن ونى قايتارادى. بىزدە دە جاعداي وسىنداي. مەملەكەتتىك قارىز دەڭگەيى - قابىلداۋعا بولاتىن دەڭگەيدە. ارينە، ونى باسقارۋ قاجەت. جىل سايىن بيۋجەتتەن قارىزدى وتەۋگە قاراجات بولىنەدى. بۇل قالىپتى جاعداي. مەملەكەتتىك قارىزبەن جۇمىس ىستەۋ كەرەك. ءبىز بۇل باعىتتا بەلسەندى جۇمىس ىستەپ جاتىرمىز. قارجى مينيسترلىگىندە ارنايى ءبولىم بار. وندا ناعىز كاسىبي ماماندار جۇمىس ىستەيدى. ولار مەملەكەت اتىنان الىناتىن ءاربىر نەسيەنىڭ كەلىسىمشارتىن مۇقيات زەردەلەپ، ەلىمىز ءۇشىن ءتيىمسىز شارتتاردىڭ بولماۋىن قاداعالايدى. بۇل ۇكىمەتتىڭ تۇراقتى باقىلاۋىندا، - دەيدى پرەمەر-مينيستر.

وسى ورايدا ب ا ق وكىلى ۇكىمەت باسشىسىنان قازاقستاننىڭ قازىرگى سىرتقى قارىزىنىڭ ناقتى كولەمىن سۇرادى.

- ءدال قازىر ناقتى سومانى ايتۋ قيىن. ءبىراق بيىل اۋقىمدى سىرتقى قارىزدى وتەۋ جوسپارلانىپ وتىر. تەك شىلدە ايىنىڭ وزىندە شامامەن 2 تريلليون تەڭگە تولەۋىمىز كەرەك. بيىل نەسيەلىك تولەم شوعىرلانعان كەزەڭ دەۋگە بولادى، 2026-جىلى ول تولەمدەر ازايا باستايدى، - دەپ ءتۇسىندىردى و. بەكتەنوۆ.

بۇعان دەيىن ۇكىمەت باسشىسى ەلىمىزدەگى ءجونسىز الەۋمەتتىك كومەككە توسقاۋىل قويىلاتىنىن ايتتى.

سونداي- اق ولجاس بەكتەنوۆ اكىمدەر مەن مينيسترلەردى نەگە اشىق سىنعا المايدى دەگەن ساۋالعا جاۋاپ بەردى.

ايتا كەتسەك، بۇگىن ۇكىمەت وتىرىسىندا ولجاس بەكتەنوۆ ونەركاسىپ جانە قۇرىلىس ءمينيسترى ەرسايىن ناعاسپايەۆتى سىنعا الىپ، تاپسىرما بەردى.