قازاقستان مۇناي ءوندىرۋدى ەرىكتى تۇردە قىسقارتۋ مەرزىمىن جازعا دەيىن سوزادى - مينيسترلىك
استانا. KAZINFORM - قازاقستان وپەك+ ۇيىمىنا قاتىسۋشى كەيبىر ەلدەرمەن بىرلەسە وتىرىپ، 2024 -جىلدىڭ ەكىنشى توقسانىنا ءوندىرىستى كۇنىنە 82 مىڭ باررەلگە قوسىمشا ەرىكتى قىسقارتۋدى ۇزارتادى. وسىلايشا، 2024 -جىلدىڭ ماۋسىم ايىنىڭ سوڭىنا دەيىن قازاقستاندا ءوندىرۋ تاۋلىگىنە 1,468 ميلليون باررەلدى قۇرايدى.
بۇل تۋرالى ق ر ەنەرگەتيكا مينيسترلىگىنىڭ باسپا ءسوز قىزمەتى حابارلادى.
ءباسپاسوز قىزمەتىنىڭ مالىمەتتەرىنە قاراعاندا، بولاشاقتا نارىقتىڭ تۇراقتىلىعىن ساقتاۋ ماقساتىندا ءوندىرىستىڭ بۇل قوسىمشا كولەمى نارىقتىق جاعدايعا بايلانىستى بىرتىندەپ قايتارىلاتىن بولادى.
بۇل ەرىكتى قىسقارتۋدى قازاقستان بۇرىن 2023 -جىلدىڭ ساۋىرىندە جاريالاعان، 2024 -جىلدىڭ جەلتوقسان ايىنىڭ سوڭىنا دەيىن سوزىلاتىن ءوندىرىستى كۇنىنە 78 مىڭ باررەلگە ءوز ەركىمەن قىسقارتۋعا قوسىمشا بولىپ تابىلادى.
«بۇل قوسىمشا ەرىكتى قىسقارتۋ مۇناي نارىقتارىنىڭ تۇراقتىلىعى مەن تەپە-تەڭدىگىن ساقتاۋ ماقساتىندا وپەك+ ەلدەرىنىڭ ساقتىق شارالارىن كۇشەيتۋگە ارنالعان»، - دەلىنگەن حابارلامادا.
