قازاقستان مەن وزبەكستان تەمىرجول سالاسىندا ءوزارا بىرلەسكەن كاسىپورىن قۇرماق
استانا. KAZINFORM - بۇل تۋرالى بۇگىن قازاقستان مەن وزبەكستان پرەزيدەنتتەرىنىڭ كەلىسسوزدەرى بارىسىندا ايتىلدى. اقوردانىڭ باسپا ءسوز قىزمەتىنىڭ حابارلاۋىنشا، كەلىسسوز بارىسىندا مەملەكەتتەر باسشىلارى ورتالىق ازياداعى تۇراقتىلىق پەن قاۋىپسىزدىكتى ساقتاۋ ماسەلەسىنە ەرەكشە نازار اۋداردى.
وسى رەتتە ورتالىق ازيا مەملەكەتتەرى باسشىلارىنىڭ كەزەكتى التىنشى كونسۋلتاتيۆتىك كەزدەسۋىنە دايىندىق بارىسى، سونداي-اق +C5 فورماتىنداعى ىقپالداستىق پەرسپەكتيۆالارى تالقىلاندى.
ەكى ەل باسشىلارى وڭىردەگى ءوزارا ىنتىماقتاستىقتى نىعايتۋ ءۇشىن قازاقستان مەن وزبەكستاننىڭ تەمىرجول اكىمشىلىكتەرى اراسىندا بىرلەسكەن كاسىپورىن قۇرۋ تۋرالى باستاماعا قولداۋ ءبىلدىردى. بۇل بىرلەسكەن كاسىپورىندى قۇرۋداعى ماقسات - قىتاي - قازاقستان - وزبەكستان باعىتىنداعى جۇك تاسىمالىن ۇيىمداستىرۋ ءۇشىن قازاق- قىتاي شەكاراسىنداعى جانە وزبەكستانداعى جۇك تەرمينالدارىن ءوزارا ءتيىمدى نەگىزدە پايدالانۋ.
اتالعان جوبا ەكىجاقتى ساۋدانى جانداندىرىپ، تاۋار تاسىمالىنىڭ كولەمىن ارتتىرۋعا ىقپال ەتەدى، سونداي-اق وڭتۇستىك باعىتتاعى جۇك تاسىمالىن ۇلعايتۋعا قولايلى جاعداي تۋعىزادى.
بىرلەسكەن كاسىپورىن ترانساۋعان باعىتىن دامىتۋعا جۇمىلدىرىلادى.
وسىعان دەيىن مەملەكەت باسشىسىنىڭ وزبەكستان پرەزيدەنتى شاۆكات ميرزيەيەۆپەن بەيرەسمي كەزدەسۋ وتكىزگەنىن حابارلادىق.
