قازاقستان مەن وزبەكستان كاسىپورىندارى تەرى وڭدەۋ سالاسىندا ارىپتەستىك ورناتپاقشى

استانا. KAZINFORM - قازاقستان-وزبەك ىسكەرلىك كەڭەسى وتىرىسىنىڭ قورىتىندىسى بويىنشا بىرنەشە ىسكەرلىك كەلىسىمگە قول قويىلدى.

قول قويىلعان قۇجاتتاردىڭ ەكەۋى تەرى وڭدەۋ مەن اياق كيىم جەتكىزۋ ماسەلەلەرىن قامتيدى:

1. وزبەكستان تەرى-اياق كيىم كاسىپورىندارى قاۋىمداستىعى مەن قازاقستان تەرى جانە ءجۇن وڭدەۋ قاۋىمداستىعىنىڭ اراسىنداعى كەلىسىم؛

2. «سيتوني» جاۋاپكەرشىلىگى شەكتەۋلى قوعامى مەن «لومانگ» جاۋاپكەرشىلى شەكتەۋلى سەرىكتەستىگى اراسىنداعى اياق كيىم ءونىمى جەتكىزۋ تۋرالى كەلىسىمشارت.

ايتا كەتۋ كەرەك، ەلوردادا وتكەن بۇل جيىندا قازاق-وزبەك بيزنەس قاۋىمداستىعىن قۇرۋ ۇسىنىلدى.

«ەكى اراداعى بىرلەسكەن كاسىپورىندار سانىنىڭ ءوسۋ قارقىنىن، ءوزارا ارىپتەستىكتىڭ الەۋەتىن ەسكەرىپ، قازاقستان-وزبەك بيزنەس قاۋىمداستىعىن قۇراتىن ۋاقىت كەلدى دەپ ەسەپتەيمىن. بۇل قاۋىمداستىق بيزنەس پەن مەملەكەتتىڭ ءتيىمدى ىقپالداستىعىنىڭ پلاتفورماسىنا اينالا الادى. ياعني، ەكى اراداعى ارىپتەستىك بيزنەستى قولداۋعا ايقىنىراق باعىتتالادى دەگەن ءسوز. ماعان بۇگىنگە دەيىن وزبەكستاندا تىركەلىپ، جۇمىس ىستەپ جۇرگەن 20 دان استام بيزنەس وكىلى وسىنداي كوميسسيا قۇرىپ، مەملەكەتتىك ورگاندارمەن كۇندەلىكتى تۋىنداپ جاتاتىن وزەكتى ماسەلەلەر بويىنشا وسى قاۋىمداستىق ارقىلى جۇمىس ىستەسەك دەگەن وتىنىشپەن جۇگىندى»، - دەدى قازاقستاننىڭ وزبەكستانداعى ەلشىسى بەيبىت اتامقۇلوۆ.