قازاقستان مەن وزبەكستان شەكاراسىنان جەكە كۋالىكپەن ءوتۋ ءتارتىبى ەنگىزىلمەك - شاۆكات ميرزيەيەۆ

تاشكەنت. KAZINFORM - وزبەكستان قازاقستان مەن تاجىكستان شەكاراسىنان ID- كارتامەن ءوتۋ ءتارتىبىن ەنگىزۋدى جوسپارلاپ وتىر.

بۇل تۋرالى ولي ءماجليستىڭ زاڭ شىعارۋ پالاتاسى دەپۋتاتتارىنىڭ الدىندا ءسوز سويلەگەن وزبەكستان پرەزيدەنتى شاۆكات ميرزيەيەۆ مالىمدەدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

«قازىرگى ۋاقىتتا ءبىزدىڭ ازاماتتار قىرعىزستانعا ID- كارتامەن (جەكە كۋالىك - اۆت.) ەركىن بارا الادى. ەندى وسىنداي ءتارتىپتى قازاقستان جانە تاجىكستانمەن شەكارالاردا ەنگىزۋ جوسپارلانىپ وتىر»، - دەدى شاۆكات ميرزيەيەۆ.

وزبەكستان باسشىسى اتاپ وتكەندەي، ورتالىق ازيا مەملەكەتتەرى اراسىنداعى تاتۋ كورشىلىك قارىم-قاتىناستى نىعايتۋ، وڭىرلىك قاۋىپسىزدىك پەن تۇراقتىلىقتى قامتاماسىز ەتۋ سىرتقى ساياساتتىڭ باسىم باعىتى بولىپ قالا بەرمەك.

«كەلەسى جىلى ەلىمىزدە وتەتىن «ورتالىق ازيا بەستىگىنىڭ» كەزدەسۋى وسى بايلانىستاردى نىعايتۋعا باعىتتالعان ۇلكەن قادام بولماق»، - دەپ توقتالدى وزبەكستان پرەزيدەنتى.

ەسكە سالساق، كەشە وزبەكستان ۇكىمەتى وتستاۆكاعا كەتتى. بۇگىن شاۆكات ميرزيەيەۆ جاڭا پرەمەر-ءمينيستردىڭ كانديداتۋراسىن دەپۋتاتتارعا ۇسىنىپ جاتىر.

ولي ماجليس دەپۋتاتتارى سايلانعاننان كەيىن پرەمەر-مينيستر مەن مينيسترلەر جاڭا سايلانعان پارلامەنت الدىندا ءوز وكىلەتتىگىن توقتاتادى. تيىسىنشە بۇل قالىپتى پروتسەدۋرا جاڭا دەپۋتاتتاردىڭ كومەگىمەن ۇكىمەت قۇرامىن جاساقتاۋعا باعىتتالعان.