قازاقستان مەن وزبەكستان اراسىنداعى جابىق تۇرعان ءىرى شەكارا بەكەتى قاشان اشىلادى

استانا. KAZINFORM - قازاقستان مەن وزبەكستان اراسىنداعى ەڭ ءىرى شەكارا وتكەلدەرىنىڭ ءبىرى - «جىبەك جولى - گيشت كۋپريك» بەكەتى 2025-جىلدىڭ اقپان ايىنان بەرى جابىق تۇر. قايتا قۇرۋ جۇمىستارى جالعاسىپ جاتقاندىقتان، ونىڭ اشىلۋى جاقىن ارادا جوسپارلانباي وتىر.

مەملەكەتتىك كىرىستەر كوميتەتىنىڭ مالىمەتىنشە، قازاقستان اۋماعىنداعى قۇرىلىس جۇمىستارى 2025-جىلدىڭ اقپانىندا باستالىپ، 2026-جىلدىڭ تامىزىنا دەيىن جالعاسادى.

- «جىبەك جولى» شەكارا بەكەتىن قايتا جاڭارتۋ جۇمىستارى 2025-جىلدىڭ اقپان ايىندا باستالدى. جوبالىق-سمەتالىق قۇجاتتاماعا سايكەس، قۇرىلىس 2026-جىلدىڭ تامىزىندا اياقتالادى، - دەپ ناقتىلادى ۆەدومستۆو.

وزبەكستانداعى ىرگەلەس «گيشت كۋپريك» بەكەتىندە دە جاڭعىرتۋ جۇمىستارى ءجۇرىپ جاتىر. العاشىندا ولاردى ءتورت اي ىشىندە اياقتاۋ جوسپارلانعانىمەن، مەرزىم كەيىنگە شەگەرىلدى.

- وزبەكستان تاراپىنداعى رەكونسترۋكتسيا جۇمىستارى ءالى اياقتالعان جوق. رەسمي مالىمەت بويىنشا، «گيشت كۋپريك» بەكەتى 2025-جىلدىڭ ءتورتىنشى توقسانىندا قايتا اشىلادى، - دەدى كوميتەت وكىلدەرى.

وسى كەزەڭدە «جىبەك جولى» بەكەتى ارقىلى جاياۋ جۇرگىنشىلەر مەن كولىك قوزعالىسى تولىعىمەن توقتاتىلعان.

ازاماتتار مەن جۇك تاسىمالداۋشىلار ءۇشىن بالاما باعىتتار ۇسىنىلدى. جاياۋ شەكارا اسۋ ءۇشىن «قاپىلانبەك»، «ب. قونىسبايەۆا»، «سىرداريا» جانە «تسەليننىي» بەكەتتەرى پايدالانىلادى.

جۇك تاسىمالى «ب. قونىسبايەۆا»، «اتامەكەن» جانە «قازىعۇرت» بەكەتتەرى ارقىلى جۇزەگە اسىرىلادى.

تەمىرجول قاتىناسى ءۇشىن «سارىاعاش» جانە «بەينەۋ» بەكەتتەرى قولجەتىمدى.

سونىمەن قاتار، «ءداۋىت اتا» مەن «تاجەن» شەكارا بەكەتتەرى 1-قىركۇيەككە دەيىن جابىق بولادى. بۇل شەشىم قوس ەلدىڭ كەلىسىمىمەن قابىلدانعان جانە جالعاسىپ جاتقان قۇرىلىس جۇمىستارىنا بايلانىستى ەنگىزىلدى.

ايتا كەتەيىك، شىلدەنىڭ باسىندا ب ق و- دا «سىرىم» اۆتوموبيل وتكىزۋ بەكەتىندە قۇرىلىس-مونتاج جۇمىستارى باستالادى.