قازاقستان مەن وزبەكستان ارال تابانىنا سەكسەۋىل وتىرعىزۋ بويىنشا بىرلەسكەن جوبا ازىرلەمەك

تاشكەنت. KAZINFORM - رەسمي استانا مەن تاشكەنت ارال تەڭىزىنىڭ قازاق- وزبەك شەكاراسى ارقىلى وتەتىن اۋماعىنا سەكسەۋىل وتىرعىزۋ بويىنشا بىرلەسكەن جوبانى ىسكە اسىرماق.

بۇل تۋرالى Kazinform اگەنتتىگىنىڭ مەنشىكتى تىلشىسىنە سۇحبات بەرگەن قاراقالپاقستاننىڭ ەكولوگيا ءمينيسترى لەيلي سەيتوۆا ءمالىم ەتتى.

- بىزگە قازاقستاندىق ارىپتەستەرىمىز كەلىپ، تاجىريبە الماسادى. ولار قاراقالپاقستاندا اتقارىلعان جۇمىستىڭ ناتيجەسىن كوردى. سەكسەۋىلدى وتىرعىزۋ تاسىلدەرىن جەتىلدىرۋ بويىنشا قازاقستانمەن بىرلەسكەن جوبالار بار. ارالدىڭ جارتىسى كورشى ەلدە، قالعانى وزبەكستان اۋماعىندا ورنالاسقان. تيىسىنشە، بىزگە شەكارا ماڭىنا سەكسەۋىل وتىرعىزۋ جوباسىن قازاقستانمەن بىرلەسىپ ازىرلەپ، كەيىن جۇزە اسىرۋ تاپسىرماسى جۇكتەلدى، - دەدى لەيلي سەيتوۆا Kazinform ءتىلشىسىنىڭ ساۋالىنا جاۋاپ بەرە وتىرىپ.

سپيكەر اتاپ وتكەندەي، ارال تەڭىزىن قايتا قالپىنا كەلتىرۋ مۇمكىن بولماسا دا، ونىڭ تەرىس سالدارىن ازايتىپ، قالعان ەكوجۇيەنى ساقتاپ قالۋ ماڭىزدى.

- ارال تەڭىزىن قايتا تولتىرا المايمىز. بۇل دالەلدى تالاپ ەتپەيتىن شىندىق. دەگەنمەن ءبىزدىڭ مىندەت - قالعان كولدەردى ساقتاپ قالۋ. ول ءۇشىن ايماق ەلدەرى اراسىنداعى ىنتىماقتاستىقتى نىعايتا ءتۇسۋ ماڭىزدى. سۋ ديپلوماتياسىن دامىتۋ ارقىلى ماسەلەنىڭ شەشىمىن تابۋعا بولادى، - دەپ ءمالىم ەتتى لەيلي سەيتوۆا.

وسى رەتتە قاراقالپاقستاننىڭ ەكولوگيا ءمينيسترى ارالدىڭ قۇرعاعان تابانىن جاسىل جەلەككە اينالدىرۋ بويىنشا اتقارىلىپ جاتقان ىستەردىڭ ناتيجە بەرە باستاعانىنا توقتالدى.

- وزبەكستان اۋماعىنداعى ارال تابانىنىڭ 2 ميلليون گەكتارىنا سەكسەۋىل وتىرعىزىلدى. بۇل 2018 -جىلى باستالعان جوبا. اتقارىلعان جۇمىس جاقسى ناتيجە بەرە باستادى. العاشقى ۋاقىتتا سەكسەۋىل جەردەن كوتەرىلەتىن %15-18 تۇز بەن شاڭدى ۇستاپ قالادى دەگەن بولجام جاسالعان. دەگەنمەن ناتيجە الدىن- الا ەسەپتەۋدەن اسىپ ءتۇستى. ياعني، سەكسەۋىل %35-40 عا جۋىق شاڭ مەن سوردىڭ كوككە كوتەرىلۋىن تەجەپ جاتىر، - دەپ قورىتىندىلادى لەيلي سەيتوۆا.

اۆتور

ءاليحان اسقار