قازاقستان مەن ۆەتنام اراسىنداعى ساۋدا-ەكونوميكالىق ىنتىماقتاستىق قارقىندى دامىپ كەلەدى - پرەزيدەنت
استانا. KAZINFORM - قازاقستان مەن ۆەتنام اراسىنداعى ساۋدا-ەكونوميكالىق جانە ينۆەستيتسيالىق ىنتىماقتاستىق قارقىندى دامىپ كەلە جاتىر. بۇل تۋرالى اقوردادا ەلىمىزگە مەملەكەتتىك ساپارمەن كەلگەن ۆەتنام كوممۋنيستىك پارتياسى ورتالىق كوميتەتىنىڭ باس حاتشىسى تو لام جوعارى دەڭگەيدەگى كەلىسسوز بارىسىندا مەملەكەت باسشىسى قاسىم-جومارت توقايەۆ ايتتى.
قازاقستان پرەزيدەنتى ەڭ الدىمەن ەلىمىزگە مەملەكەتتىك ساپارمەن كەلگەن مارتەبەلى مەيمانعا ريزاشىلىعىن ءبىلدىرىپ ءوتتى.
- مۇنى ەڭ الدىمەن قازاق-ۆەتنام ىقپالداستىعىن ودان ارى نىعايتۋعا دەگەن نيەتتىڭ ايقىن كورىنىسى دەپ باعالايمىن. ۆەتنام - قازاقستاننىڭ ازياداعى سەنىمدى سەرىكتەسى. ەلدەرىمىزدىڭ دامۋى جولىنداعى ماقسات- مىندەتتەرى دە ۇقساس. ۆەتنامنىڭ 2040 -جىلعا دەيىن ەكونوميكاسى دامىعان الەمدەگى وزىق 25 مەملەكەتتىڭ قاتارىنا كىرۋگە دەگەن تالپىنىسىن تولىق قولدايمىز. بۇل رەتتە كۇش جۇمىلدىرىپ، بىرلەسىپ، ارەكەت ەتۋگە دايىنبىز، - دەدى مەملەكەت باسشىسى.
قاسىم-جومارت توقايەۆ قازىرگى ۋاقىتتا قازاقستان مەن ۆەتنام اراسىنداعى ساۋدا-ەكونوميكالىق جانە ينۆەستيتسيالىق ىنتىماقتاستىق قارقىندى دامىپ كەلە جاتقانىنا نازار اۋدارتتى.
- ءبىز از ۋاقىت ىشىندە ءبىرقاتار ءىرى جوبانى جۇزەگە اسىردىق. الداعى ۋاقىتتا دا ءوزارا ءتيىمدى بايلانىستارىمىزدى كەڭەيتۋگە تولىق نەگىز بار. ءسىزدىڭ وسى تاريحي ساپارىڭىز جانە سونىڭ اياسىندا قول قويىلاتىن قۇجاتتار قازاق-ۆەتنام قاتىناستارىن ودان ارى كۇشەيتۋگە تىڭ سەرپىن بەرەدى، - دەدى پرەزيدەنت.
بۇعان دەيىن ۆەتنام پرەمەر-ءمينيسترىنىڭ ورىنباسارى، سىرتقى ىستەر ءمينيسترى بۋي تحان شون Kazinform اگەنتتىگىنە ەكسكليۋزيۆ سۇحبات بەرىپ، قازاقستان- ۆەتنام قارىم- قاتىناسىنىڭ جاي-كۇيى جايلى ەگجەي- تەگجەيلى ايتىپ بەرگەن ەدى.
سونداي-اق، كەيىنگى 30 جىلدان استام ۋاقىتتا ەكى ەل بايلانىسى قالاي نىعايدى؟ Kazinform اناليتيكالىق شولۋشىسى وسى تاقىرىپتى تالداپ كورگەن بولاتىن.
