قازاقستان مەن رەسەي اراسىنداعى تاۋار اينالىمىنىڭ %95 عا جۋىعى ۇلتتىق ۆاليۋتالارمەن جۇزەگە اسىرىلادى
استانا. KAZINFORM - رەسەي پرەزيدەنتى ۆلاديمير پۋتين حالىقارالىق اقپارات اگەنتتىكتەرى باسشىلارىمەن كەزدەسۋ بارىسىندا قازاقستان مەن رەسەي اراسىنداعى تاۋار اينالىمىنىڭ ءوسىپ كەلە جاتقانىن اتاپ ءوتتى، دەپ حابارلايدى Kazinform ءتىلشىسى.
- ءبىز ءوسىپ كەلە جاتقان تاۋار اينالىمىن نەگىزىنەن - شامامەن %95 - ۇلتتىق ۆاليۋتالاردا جۇرگىزىپ وتىرمىز. بۇل - وتە جاقسى كورسەتكىش. ول بىزگە تاۋارلار مەن قىزمەتتەر ءۇشىن اقشا اۋدارۋ مەن ءوزارا ەسەپ ايىرىسۋداعى قيىندىقتارعا قاراماستان، تاۋار اينالىمىنىڭ ءوسۋىن باسەڭدەتپەۋگە مۇمكىندىك بەرەدى، - دەدى ۆلاديمير پۋتين.
رەسەي پرەزيدەنتى سونىمەن قاتار ەكى ەل اراسىنداعى گۋمانيتارلىق ىنتىماقتاستىقتىڭ، سونىڭ ىشىندە ءبىلىم بەرۋ سالاسىنداعى بايلانىستاردىڭ بەلسەندى دامىپ كەلە جاتقانىن ايتىپ، الداعى ۋاقىتتا دا ءوزارا قارىم- قاتىناستار نىعايا تۇسەتىنىنە سەنىم ءبىلدىردى.
بۇعان دەيىن ۆلاديمير پۋتين يران مەن يزرايل اراسىنداعى جانجالدى شەشۋدىڭ جولى تۋرالى ايتتى.
سونداي- اق قازاقستانمەن قارىم-قاتىناستى دامىتۋدا ەشقانداي قيىندىق جوق ەكەنىن جەتكىزدى.
