قازاقستان مەن قىتاي ينۆەستيتسيالاردى ءوزارا قورعاۋ تۋرالى كەلىسىمدى جاڭارتادى

استانا. KAZINFORM — پرەمەر-ءمينيستردىڭ ءبىرىنشى ورىنباسارى رومان سكليار «ورتالىق ازيا - قىتاي» ەكىنشى يندۋستريالىق- ينۆەستيتسيالىق ىنتىماقتاستىق فورۋمىندا قازاقستان مەن قىتاي ينۆەستيتسيالاردى ءوزارا قورعاۋ تۋرالى كەلىسىمدى جاڭارتاتىنىن ءمالىم ەتتى.

- بۇگىن قىتاي ۇكىمەتىمەن ينۆەستيتسيالاردى كوتەرمەلەۋ جانە ءوزارا قورعاۋ تۋرالى جاڭارتىلعان كەلىسىمگە قول قويىلادى. بۇل قۇجات قىتايلىق ينۆەستورلاردىڭ ءبىزدىڭ ەلىمىزدە جۇمىس ىستەۋىنە بۇرىنعىدان دا قولايلى جاعداي جاسايدى.

ءبىز ءاربىر ينۆەستوردى جەكە قولداۋ جانە سۇيەمەلدەۋ قاعيداتىن ەنگىزدىك. سالىقتان، كەدەندىك باجدان بوساتۋ، زاتتاي گرانت بەرۋ، ينفراقۇرىلىم ماسەلەلەرىن شەشۋ سياقتى جەڭىلدىكتەر كوزدەلىپ وتىر، - دەدى ول.

ۆيتسە-پرەمەر قىتاي ينۆەستورلارىن قازاقستان ەكونوميكاسىنا الاڭسىز ينۆەستيتسيا قۇيۋعا شاقىردى.

- قىتايلىق سەرىكتەستەردى قازاقستاندا جانە ورتالىق ازيا ەلدەرىندە بيزنەستى دامىتۋ ءۇشىن قولدا بار مۇمكىندىكتەردىڭ ءبارىن پايدالانۋعا شاقىرامىز. بۇگىنگى ءىس-شارالار ىسكەرلىك توپتىڭ بارلىق وكىلدەرى ءۇشىن ىنتىماقتاستىقتىڭ جاڭا مۇمكىندىكتەرىن اشاتىنىنا سەنىمدىمىن، - دەدى رومان سكليار.