قازاقستان مەن قىتاي وتاندىق سۋ سالاسى ماماندارىن دايارلاۋدا ارىپتەستىكتى نىعايتپاقشى
استانا. KAZINFORM - سۋ رەسۋرستارى جانە يرريگاتسيا مينيسترلىگى قىتايداعى ارىپتەستەرىمەن كادرلاردى بىرلەسىپ دايارلاۋدى جالعاستىرۋ تۋرالى كەلىسسوزدەر جۇرگىزىپ جاتىر.
بيىل مامىر ايىنىڭ سوڭىندا سۋ مينيسترلىگىنىڭ باسشىسى نۇرجان نۇرجىگىتوۆ Power China باس ديرەكتورى ۆان بينمەن كەزدەسكەنىن ەسكە سالا كەتەيىك. قازاقستان تاراپى الداعى بىرنەشە جىل ىشىندە سۋ شارۋاشىلىعى سالاسىنداعى وتاندىق مامانداردىڭ بىلىكتىلىگىن ارتتىرۋعا مۇمكىندىك بەرەتىن ورتا مەرزىمدى وقۋ جوسپارىن ازىرلەۋدى ۇسىندى.
بۇگىندە قىتايدا قازاقستاندىق 60 مامان بىلىكتىلىگىن ارتتىردى. جىل سوڭىنا دەيىن تاعى 60 مامان قىتايدا وقۋدان وتپەك. بۇل كۋرستار قىتاي تاراپىنىڭ قارجىسى ەسەبىنەن ۇيىمداستىرىلىپ وتىر.
ەسكە سالا كەتسەك، بيىل ناۋرىز ايىندا قازاقستان مەن قىتايدىڭ سۋ ۆەدومستۆولارى العاش رەت ءوزارا تۇسىنىستىك پەن ىنتىماقتاستىق تۋرالى مەموراندۋمعا قول قويعان بولاتىن. قۇجات سۋ رەسۋرستارىن ءتيىمدى ءارى تۇراقتى پايدالانۋ، زاماناۋي تەحنولوگيالاردى ەنگىزۋ، بالامالى سۋ كوزدەرىن ءبولۋ مەن يگەرۋ، تاجىريبە الماسۋ جانە بىرلەسىپ ماماندار دايارلاۋ سياقتى باعىتتاردا ەكىجاقتى ىنتىماقتاستىقتى نىعايتۋدى كوزدەيدى.
- ءبىز تاعىلىمدامالار مەن ءبىلىم بەرۋ باعدارلامالارىن بىرلەسىپ ازىرلەۋ، سونداي-اق ءبىلىم، تاجىريبە جانە تەحنولوگيالارمەن الماسۋ باستامالارىن تالقىلاۋعا دايىنبىز. ەكى ەل اراسىنداعى تىعىز ىنتىماقتاستىق قازاقستاننىڭ سۋ سالاسىنداعى كادرلىق الەۋەتىن دامىتۋعا سەپتىگىن تيگىزەدى دەپ سەنەمىن. سونىمەن قاتار بۇل ستراتەگيالىق ارىپتەستىگىمىزدى دە نىعايتا تۇسەدى، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
