قازاقستان مەن قىتاي ترانسشەكارالىق سۋ نىساندارىن اۆتوماتتاندىرۋعا ۋاعدالاستى
استانا. KAZINFORM - سۋ رەسۋرستارى اقپاراتتىق-تالداۋ ورتالىعى قىتايمەن سۋ سالاسىن سيفرلاندىرۋ جانە ترانسشەكارالىق سۋ نىساندارىنداعى گيدروبەكەتتەردى اۆتوماتتاندىرۋ باعىتىندا ىنتىماقتاستىق ورناتتى.
سۋ رەسۋرستارى اقپاراتتىق- تالداۋ ورتالىعى قىتايمەن سۋ سالاسىن سيفرلاندىرۋ جانە ترانسشەكارالىق سۋ نىساندارىنداعى گيدروبەكەتتەردى اۆتوماتتاندىرۋ باعىتىندا ىنتىماقتاستىق ورناتتى
استانادا «ق ر جاڭا سۋ كودەكسىن ىسكە اسىرۋداعى بىرلەسكەن باستامالار: جۇزەگە اسىرۋ، تاجىريبە، پەرسپەكتيۆالار» تاقىرىبىندا دوڭگەلەك ۇستەل ءوتتى. ءىس-شارانى سۋ رەسۋرستارى جانە يرريگاتسيا مينيسترلىگىنىڭ سۋ رەسۋرستارى اقپاراتتىق-تالداۋ ورتالىعى (ا ت و)، استاناداعى ە ق ى ۇ باعدارلامالار كەڭسەسى جانە گەرمان حالىقارالىق ىنتىماقتاستىق قوعامى ۇيىمداستىردى. جيىنعا ءماجىلىس دەپۋتاتتارى، مەملەكەتتىك ورگانداردىڭ، حالىقارالىق جانە قوعامدىق ۇيىمداردىڭ، بيزنەس، عىلىمي قاۋىمداستىق پەن ديپلوماتيالىق ميسسيالاردىڭ وكىلدەرى قاتىستى.
دوڭگەلەك ۇستەلدە قاتىسۋشىلار سۋ رەسۋرستارىن باسقارۋ سالاسىنداعى مەملەكەتتىك جوسپارلاۋ ماسەلەلەرىن، سۋدى ۇتىمدى پايدالانۋ مادەنيەتىن قالىپتاستىرۋ جانە بيىل قابىلدانعان جاڭا سۋ كودەكسىن ىسكە اسىرۋ اياسىندا حالىقارالىق ىنتىماقتاستىقتى دامىتۋ جايىن تالقىلادى.
ءىس-شارا اياسىندا سۋ رەسۋرستارى اقپاراتتىق-تالداۋ ورتالىعى مەن قىتايدىڭ POWERCHINA Zhongnan Engineering Corporation Limited كومپانياسى اراسىندا ءوزارا تۇسىنىستىك تۋرالى مەموراندۋمعا قول قويىلدى.
قۇجاتقا سايكەس، ا ت و جانىنان احۋالدىق ورتالىق قۇرىلىپ، ترانسشەكارالىق سۋ نىساندارىنداعى گيدروبەكەتتەردى اۆتوماتتاندىرۋ كوزدەلىپ وتىر. جوبا قىتاي تاراپىنىڭ گرانتى ەسەبىنەن قارجىلاندىرىلادى دەپ كۇتىلىپ وتىر.
- ءبىر جىل بۇرىن پرەزيدەنتتىڭ تاپسىرماسىمەن سۋ رەسۋرستارى اقپاراتتىق-تالداۋ ورتالىعى قۇرىلعانىن بىلەسىزدەر. بۇل ورتالىق سۋ سالاسىن سيفرلاندىرۋ مەن ادىستەمەلىك باسقارۋدى جەتىلدىرۋگە ارنالعان ءتيىمدى الاڭعا اينالدى. قازىرگى كەزدە ورتالىق مەملەكەت باسشىسىنىڭ باستاماسى اياسىندا جاساندى ينتەللەكت قۇرالدارىن قولداناتىن ءبىرىڭعاي سيفرلىق پلاتفورمانى قۇرۋ جۇمىسىن جۇرگىزىپ جاتىر. مۇندا ساپالى باسسەيندىك جوسپارلاۋ ەرەكشە ماڭىزعا يە. سونداي-اق حالىقارالىق ىنتىماقتاستىقتىڭ ءرولى دە ماڭىزدى، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
