قازاقستان مەن قىتاي سوت سالاسىندا بىرلەسە جۇمىس ىستەمەك
استانا. قازاقپارات - قازاقستان رەسپۋبليكاسى جوعارعى سوتىنىڭ ءتوراعاسى اسلامبەك مەرعاليەۆ باستاعان دەلەگاتسيا قىتايدىڭ ءۇرىمجى قالاسىندا وتكەن «قىتاي - ورتالىق ازيا» جوعارعى سوت ءتوراعالارىنىڭ كەڭەسىنە قاتىستى، دەپ حابارلايدى BAQ. KZ جوعارعى سوتتىڭ باسپا ءسوز قىزمەتىنە سىلتەمە جاساپ.
ءىس-شارا ترانسشەكارالىق سوت تورەلىگىنىڭ وزەكتى ماسەلەلەرىن جانە قىلمىسپەن كۇرەسۋدەگى ىنتىماقتاستىقتى، سونداي-اق قورشاعان ورتا رەسۋرستارىن سوت ارقىلى قورعاۋدى دامىتۋدى تالقىلاۋ ءۇشىن ورتالىق ازيا مەن قىتايدىڭ جوعارى دارەجەلى سوت وكىلدەرىن جينادى.
ساپار بارىسىندا قازاقستاندىق دەلەگاتسيا قۇقىق قورعاۋ، سوت تورەلىگىن سيفرلاندىرۋ جانە حالىقارالىق قىلمىستارمەن كۇرەس ماسەلەلەرىن تالقىلادى. كەزدەسۋ اياسىندا ق ح ر جوعارعى حالىق سوتىنىڭ ءتوراعاسى جاڭ جۋنمەن ەكىجاقتى كەلىسسوزدەر جۇرگىزىلىپ، ونىڭ بارىسىندا سوت سالاسىنداعى ىنتىماقتاستىقتى نىعايتۋ پەرسپەكتيۆالارى تالقىلاندى، - دەلىنگەن حابارلامادا.
كەزدەسۋدىڭ قورىتىندىسى بويىنشا قاتىسۋشى ەلدەردىڭ سوت سالاسىنداعى ارىپتەستىكتى ودان ءارى دامىتۋ جونىندەگى نيەتىن بەكىتەتىن «ءۇرىمجى مالىمدەمەسىنە» قول قويىلدى.
