قازاقستان مەن قىتاي سپورتشىلارى دايىندىقتىڭ تەحنيكالىق قىر-سىرىن بىرلەسە پىسىقتايدى
استانا. KAZINFORM - تۋريزم جانە سپورت ءمينيسترى ەربول مىرزابوسىنوۆ شاڭحاي ىنتىماقتاستىق ۇيىمىنا (ش ى ۇ) مۇشە مەملەكەتتەردىڭ سپورت مينيسترلەرى كەڭەسى اياسىندا قىتاي حالىق رەسپۋبليكاسىنىڭ دەنە شىنىقتىرۋ جانە سپورت ىستەرى جونىندەگى باس مەملەكەتتىك باسقارماسىنىڭ جەتەكشىسى گاو چجيدانمەن كەزدەستى.
ەربول مىرزابوسىنوۆ قىتايدىڭ حالىقارالىق سپورت ارەناسىنداعى جەتىستىكتەرىن جوعارى باعالاپ، ەكى ەلدىڭ سالالىق ۆەدومستۆولارى اراسىنداعى ارىپتەستىكتى تەرەڭدەتۋ سپورت سالاسىنىڭ دامۋىنا سەرپىن بەرەتىنىنە سەنىم ءبىلدىردى.
كەزدەسۋدە سپورت سالاسىندا 1998-جىلدان قولدانىلىپ كەلە جاتقان كەلىسىمدى جاڭارتاتىن جاڭا ىنتىماقتاستىق جوباسىنا ەرەكشە نازار اۋدارىلدى. قۇجاتقا 2025-جىلدىڭ سوڭىنا دەيىن قول قويۋ جوسپارلانىپ وتىر.
- ەڭ الدىمەن، قىتاي حالىق رەسپۋبليكاسىنىڭ سپورت سالاسىنداعى جەتىستىكتەرىنە دەگەن ەرەكشە قۇرمەتىمدى بىلدىرگىم كەلەدى. قىتاي - سپورتشىلار دايىنداۋ، سپورت عىلىمىنا يننوۆاتسيالىق تاسىلدەردى ەنگىزۋ جانە سالاماتتى ءومىر سالتىن ناسيحاتتاۋ بويىنشا الەمدە كوشباسشى ەلدەردىڭ ءبىرى. ەلدەرىمىز اراسىنداعى ەكىجاقتى ىنتىماقتاستىقتى نىعايتۋ سپورت سالاسىنىڭ دامۋىنا تىڭ سەرپىن بەرەتىنىنە سەنىمدىمىن، - دەپ اتاپ ءوتتى ەربول مىرزابوسىنوۆ.
تاراپتار بىرلەسكەن وقۋ-جاتتىعۋ جيىندارى مەن سپورتشىلار اراسىندا تاجىريبە الماسۋعا قىزىعۋشىلىق ءبىلدىردى.
- ءبىز قازاقستاننىڭ سپورتتاعى جەتىستىكتەرىن، اسىرەسە اۋىر اتلەتيكا، دزيۋدو، بوكس جانە كۇرەس تۇرلەرىندەگى ناتيجەلەرىن زور ىقىلاسپەن باقىلاپ وتىرامىز. قازاقستاندىق سپورتشىلاردىڭ دەڭگەيى، تەحنيكاسى مەن جارىسقا دايىندىعى قارقىندى ءوسىپ كەلە جاتقانى بايقالادى. قازاقستان حالىقارالىق ارەنادا ءوز ورنىن ايقىنداپ، ءبىرقاتار وليمپيادالىق سپورت تۇرلەرىندە كوشباسشى ەلگە اينالىپ كەلەدى. ءبىز ەكىجاقتى ارىپتەستىكتى كەڭەيتۋگە شىن جۇرەكتەن مۇددەلىمىز، سپورتشىلارىمىزدىڭ كاسىبي وسۋىنە جاعداي جاساۋ ماقساتىندا بىرلەسە جۇمىس ىستەۋگە دايىنبىز، - دەدى گاو چجيدان.
كەزدەسۋ سوڭىندا ەربول مىرزابوسىنوۆ قىتاي سپورتشىلارىن الماتىداعى «الماتى» وليمپياداعا دايىندىق ورتالىعىندا وتەتىن وقۋ-جاتتىعۋ جيىندارىنا قاتىسۋعا شاقىردى. وسى ارقىلى ەكى ەلدىڭ سپورتشىلارى تاجىريبە الماسىپ، دايىندىقتىڭ تاكتيكالىق ءارى تەحنيكالىق قىر-سىرىن بىرلەسە پىسىقتايدى.
ايتا كەتەلىك قازاقستاندىق تەننيسشى، الەمنىڭ 191-راكەتكاسى تيموفەي سكاتوۆ رولان گارروس تۋرنيرىنىڭ ىرىكتەۋ سايىسىندا العاشقى جەڭىسىنە قول جەتكىزگەن ەدى.
