قازاقستان مەن قىتاي شەكاراسىندا العاش رەت جۇرگىزۋشىسىز جۇك كولىكتەرى قاتىناماق
استانا. KAZINFORM - قازاقستان مەن قىتاي «اقىلدى كەدەن» اتتى يننوۆاتسيالىق پيلوتتىق جوبانى قازاقستان- قىتاي شەكاراسىندا جۇزەگە اسىرۋعا كىرىستى. بۇل تۋرالى مەملەكەتتىك كىرىستەر كوميتەتى ءمالىم ەتتى.
باستاما شەڭبەرىندە «باقتى» (ق ر) - «پوكيتۋ» (ق ح ر) شەكارالىق وتكىزۋ پۋنكتتەرى ارقىلى جۇرگىزۋشىسىز جۇك تاسىمالىن ىسكە قوسۋ جوسپارلانعان.
جوبا قازاقستان رەسپۋبليكاسى قارجى مينيسترلىگىنىڭ مەملەكەتتىك كىرىستەر كوميتەتىنىڭ ءتوراعاسى جاندوس دۇيسەمبيەۆ پەن تاچىڭ قالاسى پارتيا كوميتەتىنىڭ حاتشىسى جي سيانۆەيدىڭ مىرزامەن جۇمىس كەزدەسۋىندە كەلىسىلدى.
جوبانىڭ نەگىزگى ەرەكشەلىكتەرى:
جۇرگىزۋشىنىڭ قاتىسۋىنسىز شەكارانى اۆتوماتتى تۇردە كەسىپ ءوتۋ ءۇشىن جۇرگىزۋشىسىز كولىك قۇرالدارىن (AGV) پايدالانۋ؛
ەكى ەل دە مويىندايتىن ءبىرىڭعاي ەلەكتروندىق دەكلاراتسيانى ىسكە قوسۋ؛
قولمەن جاساۋدى بارىنشا ازايتا وتىرىپ تاۋلىك بويى جۇك قوزعالىسىن قامتاماسىز ەتۋ؛
جۇك تاسىمالىن تولىق سيفرلىق سۇيەمەلدەۋ جانە رەسىمدەۋ؛
اۆتوماتتاندىرىلعان ناۆيگاتسيا مەن باقىلاۋدى ەنگىزۋ.
كۇتىلەتىن ناتيجە:
جۇك اعىنىن جىلىنا 10 ميلليون تونناعا دەيىن ۇلعايتۋ؛
كەدەندىك رەسىمدەۋ ۋاقىتىن ەداۋىر قىسقارتۋ؛
كولىك شىعىندارىن ازايتۋ؛
لوگيستيكالىق وپەراتسيالاردىڭ اشىقتىعى مەن قاۋىپسىزدىگىن ارتتىرۋ؛
اۆتوكولىك ينفراقۇرىلىمىنىڭ جۇكتەمەسىن ازايتۋ جانە لوگيستيكالىق حابتاردى دامىتۋ؛
اۋىل شارۋاشىلىعى ونىمدەرىنىڭ، سونىڭ ىشىندە استىق، مايلى داقىلدار، ەت جانە قايتا وڭدەلگەن ونىمدەردىڭ ەكسپورتىن ىنتالاندىرۋ.
جوبانىڭ ەكونوميكالىق ماڭىزى
- بۇل باستاما شەكارا ماڭى ينفراقۇرىلىمىن جاڭعىرتۋعا، جاڭا جۇمىس ورىندارىن قۇرۋعا جانە ينۆەستيسيا تارتۋعا سەرپىن بەرەدى. جوبانى ىسكە اسىرۋ قىتايمەن ساۋدا- ەكونوميكالىق ىنتىماقتاستىقتى نىعايتىپ، قازاقستاننىڭ ورتالىق ازياداعى نەگىزگى ترانزيتتىك توراپ رەتىندەگى پوزيتسياسىن كۇشەيتەدى، - دەلىنگەن حابارلامادا.
ساپار شەڭبەرىندە جوبانى بىرلەسىپ ىسكە اسىرۋعا، ءىس-قيمىلداردى ۇيلەستىرۋگە جانە كەدەندىك ءارى لوگيستيكالىق راسىمدەردى سيفرلاندىرۋ سالاسىندا تاجىريبە الماسۋعا باعىتتالعان ەكىجاقتى ىنتىماقتاستىق تۋرالى مەموراندۋمعا قول قويىلدى.
