قازاقستان مەن قىتاي بىرگە سالعان «لۋ بان» شەبەرحاناسى ينجەنەرلەردى قالاي دايىنداۋدا - فوتورەپورتاج
وسكەمەن. KAZINFORM - مەملەكەت باسشىسى قاسىم-جومارت توقايەۆ پەن قىتاي ءتوراعاسى شي جينپيڭنىڭ كەلىسىمى نەگىزىندە وسكەمەندەگى د. سەرىكبايەۆ اتىنداعى ش ق ت ۋ بازاسىندا «لۋ بان» شەبەرحاناسى اشىلعان بولاتىن. جاڭا بۋىن ينجەنەرلەرىن دايارلايتىن وسىناۋ ورتالىقتىڭ جۇمىس ىستەپ تۇرعانىنا جارتى جىلعا جاقىنداپ قالدى. Kazinform ءتىلشىسى سوندا بارىپ، قازىرگى ناتيجەلەرمەن جانە الداعى جوسپارلارمەن تانىسىپ قايتتى.
قاسىم-جومارت توقايەۆ 2023 -جىلدىڭ 18-19-مامىرىندا قىتايداعى «قازاقستان - ورتالىق ازيا» سامميتىندە قىتاي حالىق رەسپۋبليكاسىنىڭ ءتوراعاسى شي جينپيڭمەن قازاقستان اۋماعىندا ماشينۋ جاساۋدىڭ زاماناۋي شەبەرحاناسىن اشۋ جايلى كەلىسىمگە كەلدى.
سودان سوڭ ش ق و اكىمدىگى مەن ق ح ر-دىڭ تيانجين قالاسىنىڭ بيلىگى اراسىندا «لۋ بان» شەبەرحاناسىن قۇرۋ تۋرالى كەلىسىمشارتقا قول قويىلىپ، شىعىس قازاقستان تەحنيكالىق ۋنيۆەرسيتەتى مەن تيانجين كاسىپتىك ينستيتۋتى (TVI) اراسىندا مەموراندۋم جاسالدى.
سول جىلدىڭ تامىز ايىندا ۋنيۆەرسيتەتتەگى 15 وقىتۋشى تيانجينگە ساپار شەگىپ، ءوز بىلىكتىلىكتەرىن ارتتىرىپ كەلدى. ال جەلتوقسان ايىندا وسكەمەندە شەبەرحانا رەسمي تۇردە اشىلدى.
وسىلايشا، «لۋ بان» شەبەرحاناسى ورتالىق ازيا ەلدەرى اراسىندا العاش رەت ءوز جۇمىسىن باستادى.
مۇندا ينجەنەرلەردى بۇكىلالەمدىك CDIO باستاماسى اياسىندا وقىتادى. ستۋدەنتتەر ەلەكتر ستانسالارى مەن اككۋمۋلياتورلىق باتارەيالاردى جوندەۋگە ماشىقتانىپ، ماشينا جاساۋدىڭ قىر-سىرىن مەڭگەرەدى.
زاماناۋي شەبەرحانادا جوعارعى وقۋ ورنىنداعى «كولىك، كولىك تەحنيكاسى جانە تەحنولوگيالارى»، «تاسىمالداۋدى، قوزعالىستى جانە كولىكتى پايدالانۋدى ۇيىمداستىرۋ» ماماندىقتارىنىڭ 400-گە جۋىق ستۋدەنتى ءبىلىم الۋدا.
«لۋ بان» شەبەرحاناسىنىڭ 4 زەرتحاناسى بار. ءبىرىنشىسى - جانارمايلى قوزعالتقىشتى اۆتوكولىكتەرگە تەحنيكالىق قىزمەت كورسەتۋ، جوندەۋ جانە دياگنوستيكالاۋ. ەكىنشىسى - ءداستۇرلى اۆتوكولىك جۇيەلەرىن سيمۋلياتسيالىق سىناۋ.
ءۇشىنشىسى - ەلەكتروموبيلدەرگە جانە گيبريد كولىكتەرگە تەحنيكالىق قىزمەت كورسەتۋ، جوندەۋ جانە دياگنوستيكالاۋ.
ءتورتىنشىسى - اۆتوكولىكتەردىڭ SMART- تەحنولوگيالارى.
«پرەزيدەنت قاسىم-جومارت توقايەۆ 2024 -جىلدىڭ اقپان ايىندا وسىندا كەلىپ، شەبەرحانا جۇمىسىمەن تانىسىپ، جوعارى باعاسىن بەردى. شەبەرحانا جاستارىمىزعا نارىقتاعى وزىق تەحنولوگيالارمەن جۇمىس ىستەۋدى قالاي ۇيرەتۋگە بولاتىندىعىن كورسەتىپ بەردى. جوعارى بىلىكتى ماماندار قازاقستاننىڭ تۇكپىر-تۇكپىرىندەگى كومپانيالارعا جۇمىسقا ورنالاسىپ، مۇندا ۇيرەنگەندەرىن كادەگە جاراتاتىنىنا سەنىمىمىز كامىل. الەم بويىنشا بارلىعى 30 عا جۋىق «لۋ بان» شەبەرحاناسى بار. الداعى ۋاقىتتا قازاقستاندا تاعى دا شەبەرحانالار اشىلادى دەپ كۇتىلۋدە. ءبىز ءوز تاجىريبەمىزبەن بولىسۋگە قاشاندا ءازىرمىز»، - دەيدى ش ق ت ۋ اكادەميالىق ماسەلەلەر جونىندەگى پرورەكتورى ءاسيا ماشەكەنوۆا.
ۋنيۆەرسيتەتتە 15 تەن استام جاڭا ءپان ەنگىزىلىپ، ولاردىڭ مازمۇنى ەلەكتروموبيلدەردى، گيبريدتى كولىكتەردى جانە ءداستۇرلى كولىكتەردىڭ SMART تەحنولوگيالارىن زەرتتەۋگە باعىتتالعان.
«Astana Motors» كومپانياسى دا ج و و-مەن كەلىسىمگە كەلىپ، ءوز قىزمەتكەرلەرىن شەبەرحاناعا وقۋعا جىبەرىپ، ورتاق جوبالاردى قولعا الۋعا نيەتتى.
ۋنيۆەرسيتەت وقىتۋشىلارى دا بىلىكتىلىكتەرىن ارتتىرۋدى جالعاستىرىپ، وسى جانە كەلەسى جىلى دا تيانتسزين كاسىپتىك ينستيتۋتىنا بارادى.
«لۋ بان» شەبەرحاناسى بىزگە يننوۆاتسيالىق مۇمكىندىكتەر اشىپ، جاڭا قۇرىلعىلارمەن تانىسۋعا جاعداي جاسادى. وقۋ بارىسىندا كوپ دۇنيەنى ۇيرەنىپ، بىلمەگەنىمىزدىڭ جاۋابىن وسىندا تاۋىپ جاتىرمىز. كولىكتىڭ كىشكەنتاي ءبىر بولشەگىنەن باستاپ ۇلكەن قوزعالتقىشىنا دەيىن قولمەن ۇستاپ كورىپ، ونىڭ قالاي جۇمىس ىستەيتىنىمەن تانىسۋدامىز. ەلەكتروموبيلدەر قۇرىلىمىن بۇگە- شۇگەسىنە دەيىن ءبىلىپ، ولارعا قالاي قىزمەت كورسەتۋدى مەڭگەرۋدەمىز. ديپلوم العان سوڭ كولىكتىك تەحنيكا قولدانىلاتىن زاۋىتتاردىڭ بىرىنە جۇمىسقا تۇرۋدى جوسپارلاپ وتىرمىن»، - دەيدى «كولىك، كولىك تەحنيكاسى جانە تەحنولوگيالارى» ماماندىعىنىڭ 3-كۋرس ستۋدەنتى قۋاندىق ماناپوۆ.
قورىتا كەتسەك، بۇل شەبەرحانا قازاقستاندا ەلەكتروموبيلدەر شىعاراتىن زاۋىتتاردا جۇمىس ىستەيتىن سۇرانىسقا يە ينجەنەرلىك كادرلاردى دايارلاۋدا.
الداعى ۋاقىتتا «Smart Driving Technology» ينجينيرينگتىك ورتالىعى قۇرىلىپ، اكادەميالىق جانە عىلىمي- زەرتتەۋ اسپەكتىلەرى بويىنشا ەلەكترمەن جۇمىس ىستەيتىن كولىك جابدىقتارىن شىعاراتىن زاۋىتتارمەن ىنتىماقتاستىق ورناتىلادى دەپ كوزدەلىپ وتىر.
ءوز جەمىسىن بەرىپ جاتسا الدا قازاقستاننىڭ باسقا دا وڭىرلەرىندە وسىنداي شەبەرحانالار بوي كوتەرمەك.
اۆتور
تالعاتجان مۇحامەتبەك ۇلى
