قازاقستان مەن قىتاي اراسىندا چيڭداۋدا 125 ميلليون دوللار كەلىسىمگە قول قويىلدى
استانا. KAZINFORM - چيڭداۋدا وتكەن ساۋدا- ەكونوميكالىق ميسسيانىڭ قورىتىندىسى بويىنشا قازاقستاندىق كومپانيالار قىتايلىق سەرىكتەستەرمەن جالپى سوماسى $125 ميلليون بولاتىن كەلىسىمدەرگە كەلدى. بۇل تۋرالى ساۋدا جانە ينتەگراتسيا مينيسترلىگىنىڭ باسپا ءسوز قىزمەتى حابارالادى.
شاندۋڭ - قىتايداعى ءىرى ەكونوميكالىق وڭىرلەردىڭ ءبىرى. مۇندا قۋاتتى ءوندىرىس بازاسى مەن ۇلكەن تۇتىنۋ نارىعى بار. QazTrade مالىمەتىنشە، 2025 -جىلدىڭ قورىتىندىسى بويىنشا قازاقستان مەن شاندۋڭ اراسىنداعى تاۋار اينالىمى $2,2 ميللياردقا جەتىپ، 40 پايىزدان استام ءوستى.
ميسسياعا 25 تەن استام وتاندىق كومپانيا قاتىستى. ساپاردىڭ نەگىزگى بولىگى قىتايلىق يمپورتتاۋشىلار مەن ديستريبيۋتورلارمەن تىكەلەي B2B كەزدەسۋلەرگە باعىتتالدى.
قازاقستان قىتاي تاراپىنا اگروونەركاسىپ پەن تەرەڭ وڭدەلگەن ونىمدەر ۇسىندى. ۇن، ماي ونىمدەرى، بال، ءسۇت جانە كونديتەرلىك تاۋارلار قىتايلىق بيزنەس تاراپىنان جوعارى قىزىعۋشىلىق تۋدىردى.
ساپار اياسىندا ساۋدا جانە ينتەگراتسيا ءمينيسترى ارمان شاققاليەۆ شاندۋڭ پروۆينسياسىنىڭ باسشىلىعى جانە بيزنەس وكىلدەرىمەن كەلىسسوز وتكىزدى. نەگىزگى نازاردا جەتكىزىلىم كولەمىن ارتتىرۋ جانە كەلىسسوزدەردى ناقتى ناتيجەگە اينالدىرۋ. سونداي-اق يندۋستريالىق كووپەراتسيا ماسەلەسى دە تالقىلاندى. ساپار اياسىندا مينيستر الەمدىك ءىرى تۇرمىستىق تەحنيكا وندىرۋشىلەرىنىڭ ءبىرى Haier كومپانياسىنىڭ وندىرىستىك الاڭىنا باردى.
