قازاقستان مەن ۋكراينا ارنايى وپەراتسيا جۇرگىزدى: 9 ادام ۇستالدى
استانا. قازاقپارات – 23-قىركۇيەكتە قازاقستان مەن ۋكراينا ارنايى وپەراتسيا جۇرگىزدى.
چەرنوۆتسى مەن ودەسسا قالالارىندا ۇزاق مەرزىمدى بىرلەسكەن جەدەل ءىس-شارالار ناتيجەسىندە قازاقستان ازاماتتارىن الداۋمەن اينالىسقان call ورتالىق جويىلدى.
سحەما قالاي جۇزەگە اسقان؟
ءى ءى م مالىمەتىنشە، كۇدىكتىلەر الدىن الا قۇرىلعان سحەما بويىنشا ارەكەت ەتكەن. ولار جابىرلەنۋشىلەرگە قازاقستاننىڭ ۇلتتىق بانكى، قۇقىق قورعاۋ ورگاندارى مەن ارنايى قىزمەتتەرى اتىنان قوڭىراۋ شالىپ، «كۇدىكتى وپەراتسيالار»، «تەرروريستىك ۇيىمداردى قارجىلاندىرۋ» ءۇشىن قىلمىستىق جاۋاپكەرشىلىككە تارتامىز دەپ قورقىتىپ، ازاماتتاردى نەسيە الۋعا، مۇلكىن ساتۋعا جانە دەپوزيتتەگى قاراجاتتى دروپتاردىڭ شوتىنا اۋدارۋعا ماجبۇرلەگەن. وسىلايشا پسيحولوگيالىق قىسىم جاساعان.
توپ ناقتى يەرارحيادان تۇرعان. اركىم ءوز ءرولىن اتقارعان. قىلمىستىق جولمەن الىنعان اقشا call ورتالىقتىڭ جۇمىسىنا، كولىك ساتىپ الۋعا جانە تاعى دا باسقا نارسەلەرگە جۇمسالعان.
«كەڭسەنى» ۇستاۋ ءۇشىن ۇيىمداستىرۋشىلار ايىنا 60 مىڭ ا ق ش دوللارىن جاراتقان، ال كۇدىكتىلەردىڭ ءبىرى كەيىنگى التى ايدا بەس كولىك ساتىپ العان. ءبىر مەزگىلدە كۇدىكتىلەردىڭ تۇرعىلىقتى مەكەن جايلارى بويىنشا جانە call ورتالىقتىڭ وزىندە جۇرگىزىلگەن ءتىنتۋ بارىسىندا 30 دان اسا كومپيۋتەرلىك تەحنيكا، 79 ۇيالى تەلەفون، sim كارتالار، كيىم-كەشەك، قۇقىق قورعاۋ جانە ارنايى ورگانداردىڭ، ۇلتتىق بانكتىڭ قىزمەتكەرلەرىنىڭ جالعان كۋالىكتەرى، ازاماتتاردى الداۋعا ارنالعان ءتۇرلى جاۋاپ نۇسقالارى بار الدىن الا دايىندالعان سەناريلەر، سونداي-اق، باسقا دا ايعاقتار تاركىلەندى»، - دەدى ءى ءى م كيبەرقىلمىسقا قارسى ءىس-قيمىل دەپارتامەنتى باستىعىنىڭ ورىنباسارى اسلان وسكەمبايەۆ.
كەلگەن شىعىن
الدىن الا مالىمەت بويىنشا قاسكۇنەمدەر قازاقستان تۇرعىندارىن 900 ميلليون تەڭگەدەن اسا سوماعا الداعان.
توعىز ادام ۇستالدى
ارنايى وپەراتسيا ناتيجەسىندە ۋكراينانىڭ توعىز ازاماتى ۇستالىپ، ونىڭ بەسەۋى قاماۋعا الىنعان.
