قازاقستان مەن ازەربايجان الاكولدە شيپاجاي كەشەنىن سالادى
استانا. KAZINFORM - قازاقستاننىڭ ازەربايجانداعى ەلشىسى ءالىم بايەل ازەربايجاننىڭ ەكونوميكا ءمينيسترى ميكايل دجابباروۆپەن كەزدەستى، دەپ حابارلايدى Kazinform ءتىلشىسى.
تاراپتار ساۋدا-ەكونوميكالىق، ينۆەستيتسيالىق، كولىك-لوگيستيكا، ەنەرگەتيكا جانە قۇرىلىس سالالارىنداعى ەكىجاقتى ىنتىماقتاستىقتىڭ قازىرگى جاعدايى مەن بولاشاعىن تالقىلادى.
ءالىم بايەل ەكىجاقتى تاۋار اينالىمىنىڭ جالعاسىپ كەلە جاتقانىن اتاپ ءوتتى. بيىلعى ءتورت ايدا ءوسىم 20 پايىز بولدى. اسىرەسە، 2025 -جىلى قازاقستان العاش رەت ازەربايجانعا بيدايدىڭ نەگىزگى جەتكىزۋشىسى بولىپ، ازەربايجاننىڭ استىق يمپورتىنىڭ 88 پايىزىن قامتاماسىز ەتكەنى قۋانتادى.
ءوز كەزەگىندە ميكايل دجابباروۆ قازاقستانمەن ەكونوميكالىق ىنتىماقتاستىقتى دامىتۋ ازەربايجان ءۇشىن ستراتەگيالىق ماڭىزدى ەكەنىن اتاپ ءوتتى. بۇل تۇرعىدا ول ترانسكاسپي حالىقارالىق كولىك جولى (ت ي ر)، كاسپي تەڭىزىنىڭ تۇبىمەن تالشىقتى- وپتيكالىق بايلانىس جەلىسىن (ت و ب ج) تارتۋ، قازاقستاننىڭ ەنەرگەتيكالىق رەسۋرستارىنىڭ ازەربايجان اۋماعى ارقىلى ترانزيتتىك ءوتۋى، سونداي- اق تەڭىز ءتۇبى ءۇشىن ۇلكەن ماڭىزى بار تەرەڭ تەڭىز ەلەكتر كابەلىن تارتۋ تۋرالى كەلىسىم سياقتى ايماقتاعى ءىرى بىرلەسكەن جوبالاردىڭ ىسكە اسىرىلۋىن جوعارى باعالادى.
ەلشى ءالىم بايەل ازەربايجاندىق مينيسترگە قازاقستان باسشىلىعىنىڭ ازەربايجانمەن وندىرىستىك كووپەراتسيانى دامىتۋعا ەرەكشە كوڭىل بولەتىنىن حابارلادى. وسى تۇرعىدا ول قازاقستاندا ينفۋزيالىق ەرىتىندىلەردىڭ بىرلەسكەن ءوندىرىسىن قۇرۋدى ۇسىندى.
سونداي-اق ءالىم بايەل ازەربايجان تاراپىنا الاكول كولىنىڭ جاعاسىندا ساۋىقتىرۋ كەشەنىن سالۋدى ۇسىندى. ميكايل دجابباروۆ بۇل باستاما بويىنشا ىنتىماقتاستىققا دايىن ەكەنىن ءبىلدىردى. تاراپتار ولاردى جۇزەگە اسىرۋدىڭ ەگجەي-تەگجەيىن تالقىلادى.
سونداي-اق تاراپتار تۇرعىن ۇيلەر مەن الەۋمەتتىك نىسانداردى سالۋداعى قۇرىلىس كومپانيالارىنىڭ قىزمەتىن ودان ءارى كەڭەيتۋ ماسەلەلەرىن تالقىلادى. ءبىرقاتار قازاقستاندىق كومپانيالاردىڭ ازەربايجاندا مەديتسينالىق مەكەمەلەر مەن تۇرعىن ۇيلەر سالۋعا كىرىسكەنى اتالىپ ءوتتى.
كاسپيدە قازاقستان مەن ازەربايجاننىڭ اسكەري تەڭىز كۇشتەرى جاتتىعىپ جاتقانىن جازعان بولاتىنبىز.
