قازاقستان مەكتەپتەرىنە وقۋشىلاردى كاسىپتىك باعدارلاۋعا ارنالعان جاڭا سيفرلىق قۇرال ەنگىزىلمەكشى
استانا. KAZINFORM - ى. التىنسارين اتىنداعى ۇلتتىق ءبىلىم اكادەمياسى «ەڭبەك رەسۋرستارىن دامىتۋ ورتالىعى» ا ق- مەن بىرلەسىپ وقۋشىلارعا كاسىپتىك باعدار بەرۋدىڭ «وقۋشىنىڭ قىزىعۋشىلىقتارى مەن داعدىلارىنىڭ يكەمدى بەيىنى» (و ق د ي ب) سيفرلىق ادىستەمەسىن ازىرلەدى. بۇل تۋرالى وقۋ-اعارتۋ مينيسترلىگى ءمالىم ەتتى.
اتالعان باستاما بولاشاق كاسىپتى ەرتە جاستان سانالى تاڭداۋدى قالىپتاستىرۋعا باعىتتالعان جانە 7-9 سىنىپ وقۋشىلارىنا ارنالعان. بۇل ادىستەمە وقۋشىلارعا قىزىعۋشىلىقتارىن ايقىنداۋعا، قابىلەتتەرىن انىقتاۋعا جانە ودان ءارى دامۋ ءۇشىن وڭتايلى باعىتتاردى تاڭداۋعا كومەكتەسەدى. ازىرلەمە قازاقستاندىق مازمۇنعا بەيىمدەلگەن جانە ەلىمىز بويىنشا 10 مىڭنان استام وقۋشى قاتىسقان سىناقتان وتكەن.
- بۇل قۇرال ۋنيۆەرسيتەتتەردىڭ 400 دەن استام باعدارلاماسى، كوللەدجدەردىڭ 200 گە جۋىق ماماندىعى مەن جۇمىسشى كاسىپتەرىن بىرىكتىرەتىن مانساپ كومپاسى سيفرلىق پلاتفورماسىنا ەنگىزىلگەن. پلاتفورما وقۋشىلاردىڭ، پەداگوگتەردىڭ جانە اتا-انالاردىڭ جەكە كابينەتتەرىنە قول جەتكىزۋدى قامتاماسىز ەتە وتىرىپ، ءبىر تسيفرلىق كەڭىستىكتە جۇيەلى كاسىپتىك باعدارلاۋدى قامتاماسىز ەتەدى. تەست ناتيجەلەرى اۆتوماتتى تۇردە وڭدەلەدى: وقۋشىلار - جەكە اقىل- كەڭەستەر، پەداگوگتەر - زاماناۋي سۇيەمەلدەۋ قۇرالدارىن، ال اتا- انالار - بالانىڭ دامۋ ساراپتاماسى مەن ديناميكاسى تۋرالى اقپارات الادى، - دەپ اتاپ ءوتتى التىنسارين اكادەمياسىنىڭ پرەزيدەنتى ءنازيپا ايۋبايەۆا.
جوبا جالپى ءبىلىم بەرەتىن مەكتەپتەرگە زاماناۋي، تۇراقتى جانە بولاشاققا باعدارلانعان كاسىپتىك باعدارلاۋ جۇيەسىن قۇرۋعا جاعداي جاساپ، ءاربىر بالاعا بولاشاق كاسىبي جولىن سانالى تاڭداۋعا مۇمكىندىك بەردى.
ايتا كەتەيىك، مەكتەپكە دەيىنگى ءبىلىم سالاسىندا ۆاۋچەرلىك قارجىلاندىرۋ جۇيەسى وسى جىلدىڭ سوڭىنا دەيىن تولىق ەنگىزىلەدى.
