قازاقستان ەكونوميكاسىنىڭ 2023-جىلعى باستى جاڭالىعى قانداي - ساراپشى پىكىرى

وتكەن جىلى قازاقستان ەكونوميكاسى ەنەرگەتيكالىق داعدارىس، كۇردەلى گەوساياسي جاعدايلار جانە جەتكىزۋ تىزبەگىنىڭ ءۇزىلۋى سەكىلدى ءبىرقاتار قيىندىققا تاپ بولدى.

سالدارىنان جىلدىق ينفلياتسيا 20 پايىزدان استى. 2023-جىلى ۇلتتىق بانك ءبىرقاتار شارا قابىلداۋعا ءماجبۇر بولدى جانە ناتيجەسى جامان ەمەس. ەكونوميكا ساراپشىسى ارمان بايعانوۆ Kazinform تىلشىسىمەن سۇحباتىندا قازاقستان ەكونوميكاسىنداعى بيىلعى نەگىزگى وزگەرىستەر تۋرالى پىكىر ءبىلدىردى.

قازاقستان ەكونوميكاسىنىڭ بيىلعى باستى جەتىستىگى - ينفلياتسيا قارقىنىنىڭ باسەڭدەۋى. بۇگىندە ينفلياتسيا دەڭگەيى 10,3 پايىزدى قۇراسا، وتكەن جىلى جىلدىق ينفلياتسيا دەڭگەيى 21,3 پايىزعا جەتكەن، - دەدى ارمان بايعانوۆ.

ونىڭ ايتۋىنشا، سيفرلىق ۆاليۋتانىڭ ەنگىزىلۋىن دە جەتىستىك دەپ ساناۋعا بولادى.

قازىر سيفرلاندىرۋ بەلسەندى ءجۇرىپ جاتىر، بۇل اقشا-نەسيە قاتىناستارىنا جاقسى اسەر ەتەدى. بيىل ۇلتتىق بانك سيفرلىق ۆاليۋتانى تانىستىردى. مەنىڭ ويىمشا، ەرتە مە، كەش پە، قازاقستاندىقتارعا سيفرلىق ۆاليۋتانى پايدالانۋ ىڭعايلىراق بولادى. بۇل سىبايلاس جەمقورلىق پەن كولەڭكەلى ەكونوميكانىڭ قارقىنىن تومەندەتەدى، - دەپ اتاپ ءوتتى ساراپشى.

جالپى، ەكونوميكاداعى جەتىستىكتەردى ونىڭ ءوسۋ قارقىنىمەن باعالاۋعا بولادى.

1-جەلتوقسانداعى ەكونوميكالىق ءوسىم 4,9 پايىزدى قۇرادى. وتكەن جىلى بۇل كورسەتكىش 3 پايىزعا دا جەتپەيتىن. بۇل رەتتە جان باسىنا شاققانداعى جالپى ىشكى ءونىمنىڭ ورتاشا ءوسىمى وتكەن جىلمەن سالىستىرعاندا 11 پايىزعا جوعارى، - دەپ تولىقتىردى ارمان بايعانوۆ.

ايتا كەتەيىك، بۇعان دەيىن حالىقارالىق ۆاليۋتا قورى قازاقستان ەكونوميكاسىنىڭ ءوسىمىن 4,3 پايىزعا جەتەدى دەگەن بولجام جاساعان.