قازاقستان كۇكىرت قىشقىلىنىڭ تاپشىلىعىنان قاشان قۇتىلادى

استانا. KAZINFORM - پرەمەر-مينيستر ولجاس بەكتەنوۆ ۇكىمەت وتىرىسىندا ەلدەگى كۇكىرت قىشقىلىنىڭ تاپشىلىعىنا الاڭداۋشىلىق ءبىلدىردى.

- بىزدە بىرنەشە جىل بويى كۇكىرت قىشقىلى تاپشىلىعى بايقالىپ وتىر. ماسەلەنى قالاي شەشەمىز، - دەپ سۇرادى ولجاس بەكتەنوۆ ونەركاسىپ جانە قۇرىلىس ءمينيسترى ەرسايىن ناعاسپايەۆتان.

ءمينيستردىڭ سوزىنشە بۇل ماسەلەنى شەشۋگە كەمىندە 3 جىل كەرەك.

- بىزدە جوسپار بويىنشا الداعى جىلدا «ەۆروحيم- قاراتاۋ» جانە «تايقوڭىر» قىشقىل زاۋىتى ىسكە قوسىلادى. سونىڭ ناتيجەسىندە، 1,6 ميلليون توننا كۇكىرت قىشقىلى وندىرىلە باستايدى. ياعني، 2028 -جىلعا دەيىن قازاقستاننىڭ ىشكى سۇرانىسى تولىق جابىلادى، - دەدى ول.

ەسكە سالساق، بىلتىر جەلتوقساندا اتىراۋ مۇناي وڭدەۋ زاۋىتىنىڭ اشىق الاڭىندا كۇكىرت جيناعان كومپانياعا ايىپپۇل سالىنعان بولاتىن.