قازاقستان جولدارىنىڭ ۆيرتۋالدى كوشىرمەسى جاسالىپ جاتىر
استانا. KAZINFORM - قازاقستان جول عىلىمي-زەرتتەۋ ينستيتۋتى اۆتوموبيل جولدارىنىڭ ۆيرتۋالدى كوشىرمەسىن ازىرلەۋ جۇمىسىن باستاپ كەتتى.
جۇمىستار جولداردىڭ ەلەكتروندىق پاسپورتتارىن ازىرلەۋ جونىندەگى جوبا شەڭبەرىندە جۇرگىزىلەدى.
سيفرلىق بالاما - جول ينفراقۇرىلىمىنىڭ ۆيرتۋالدى كوشىرمەسى، ءوز كەزەگىندە جولداعى پروتسەستەردى باسقارۋدى وڭتايلاندىرۋعا مۇمكىندىك بەرەدى.
جول عىلىمي- زەرتتەۋ ينستيتۋتىنىڭ ماماندارى 3D بەينە سكانەرلەۋدىڭ وزىق تەحنولوگياىن پايدالانۋدا.
ازىرلەنگەن باعدارلامالىق قۇرال عيماراتتاردى، تروتۋارلاردى جانە بەلگىلەردى قوسا العاندا، جولدار مەن كوشە جوسپارلارىن كورسەتەدى.
جينالعان مالىمەتتەر نەگىزىندە جول قىزمەتتەرى ءۇشىن ەسەپ- يساپ جاسالادى.
«اتالعان جۇيە پروبلەمالاردى جەدەل انىقتاۋعا جانە ينفراقۇرىلىمعا ارالاسپاي-اق شەشىم تابۋعا كومەكتەسەدى. تەحنولوگيا وزگەرىستەردىڭ سالدارلارىن بولجاۋعا مۇمكىندىك بەرىپ، كوشە-جول جەلىسىنىڭ پارامەترلەرىن ولشەۋ بارىسىندا جينالعان دەرەكتەرگە نەگىزدەلەدى»، - دەيدى ماماندار.
سيفرلىق جاڭاشىلدىقتى ەنگىزۋ جولدار مەن قۇرىلىستاردىڭ جاي-كۇيى تۋرالى ورتالىقتاندىرىلعان دەرەكتەر بازاسىن قۇرۋ ارقىلى جول جەلىسىن باسقارۋدىڭ تيىمدىلىگىن ارتتىرا تۇسپەك.
بۇل جاڭارتىلعان دەرەكتەر نەگىزىندە جوندەۋ جانە تەحنيكالىق قىزمەت كورسەتۋ جۇمىستارىن جوسپارلاۋعا ءارى ۇيلەستىرۋگە مۇمكىندىك بەرەدى.
رەسۋرستاردى ءدال بولجاۋ جانە ءبولۋ ارقىلى شىعىندار ازايادى دەپ كۇتىلۋدە.
جولداردىڭ جاي-كۇيىنە تۇراقتى مونيتورينگ جۇرگىزۋ جانە باسقارۋدىڭ زاماناۋي ستاندارتتارىن ەنگىزۋ ينفراقۇرىلىمنىڭ قاۋىپسىزدىگى مەن ساپاسىن ارتتىرۋدى قامتاماسىز ەتپەك.
دەرەكتەردى تالداۋ پروبلەمالىق ايماقتاردى انىقتاۋعا مۇمكىندىك بەرەدى، ال ۆيزۋاليزاتسيا جول جەلىسىنىڭ جاعدايى تۋرالى كورنەكى اقپارات ۇسىنادى.
ەستەرىڭىزگە سالا كەتەيىك، قازىر قازجولعزي ماماندارى كوشە-جول جەلىسىن باسقارۋدىڭ ءبىرىڭعاي جۇيەسىنە ەنگىزە وتىرىپ، ەلىمىزدىڭ ءتۇرلى وڭىرلەرىندە اۆتوموبيل جولدارىنىڭ ەلەكتروندى پاسپورتىن جاساپ جاتىر.
