قازاقستان حالىقارالىق بانكتەن 85 ميلليارد يەن قارىز الادى
استانا. KAZINFORM - پارلامەنت ءماجىلىسىنىڭ قاراۋىنا «قازاقستان رەسپۋبليكاسى مەن حالىقارالىق قايتا قۇرۋ جانە دامۋ بانكى اراسىنداعى قارىز تۋرالى كەلىسىمدى راتيفيكاتسيالاۋ تۋرالى» زاڭ جوباسى كەلىپ ءتۇستى.
زاڭ جوباسى 2024 -جىلعى 18-قاراشادا ۇكىمەت قاۋلىسىمەن ەنگىزىلدى.
«اتالعان كەلىسىم 2024 -جىلعى 11-قازاندا استانادا جاسالعان. حالىقارالىق قايتا قۇرۋ جانە دامۋ بانكىنىڭ قارىزى قازاقستان رەسپۋبليكاسىنا 84,9 ميلليارد يەن سوماسىندا بەرىلەدى. ونى وتەۋ مەرزىمى - 11 جىل. قارىز قاراجاتى ەل ەكونوميكاسىنىڭ تۇراقتىلىعىن قولداۋ ءۇشىن تارتىلىپ جاتىر. ءماجىلىستىڭ قارجى جانە بيۋدجەت كوميتەتى وسى زاڭ جوباسى بويىنشا قورىتىندى ازىرلەۋگە دايىن»، - دەدى پالاتا دەپۋتاتى تاتيانا ساۆەليەۆا ءماجىلىستىڭ جالپى وتىرىسىندا.
بۇدان بۇرىن حابارلانعانداي، جاقىندا پارلامەنت ءماجىلىسىنىڭ قاراۋىنا «قازاقستان مەن ازيا دامۋ بانكى اراسىنداعى قارىز تۋرالى كەلىسىمدى راتيفيكاتسيالاۋ تۋرالى» زاڭ جوباسى جانە «قازاقستان مەن ازيا ينفراقۇرىلىمدىق ينۆەستيتسيالار بانكى اراسىنداعى قارىز تۋرالى كەلىسىمدى راتيفيكاتسيالاۋ تۋرالى» زاڭ جوباسى كەلىپ ءتۇستى. وسى ەكى قۇجات بويىنشا جالپى قارىز كولەمى 105 ميلليارد يەندى قۇرايدى.
اۆتور
رۋسلان عابباسوۆ
