قازاقستان حالىقارالىق ازاماتتىق اۆياتسيا ۇيىمىنا رەسمي تىركەلدى
مونرەال. KAZINFORM - قازاقستان رەسپۋبليكاسىنىڭ حالىقارالىق ازاماتتىق اۆياتسيا ۇيىمى (ي ك ا و) جانىنداعى تۇراقتى وكىلى تيمۋر تىلەگەنوۆ مونرەال قالاسىنداعى ي ك ا و شتاب-پاتەرىندە وسى حالىقارالىق ۇيىمنىڭ باس حاتشىسى حۋان كارلوس سالازارعا سەنىم گراموتاسىن تابىستادى.
سۇحبات بارىسىندا ازاماتتىق اۆياتسيا سالاسىنداعى ىنتىماقتاستىقتى دامىتۋدىڭ وزەكتى ماسەلەلەرى تالقىلاندى.
باس حاتشى ق ر پرەزيدەنتى قاسىم-جومارت توقايەۆقا قازاقستاننىڭ ي ك ا و جانىنداعى تۇراقتى وكىلدىگىن اشۋ تۋرالى شەشىم قابىلداعانى ءۇشىن العىسىن ايتىپ، تۇراقتى وكىلدى ءوز قىزمەتىنە كىرىسۋىمەن قۇتتىقتادى.
حۋان كارلوس سالازار تۇراقتى وكىلدىكتىڭ قىزمەتى قازاقستان مەن وسى ۇيىم اراسىنداعى ستراتەگيالىق سەرىكتەستىكتىڭ ءارى قارايعى دامۋىنا ءوز سەپتىگىن تيگىزەتىنىنە سەنىم ءبىلدىردى.
سونىمەن قاتار باس حاتشى قازاقستاننىڭ حالىقارالىق ارەناداعى جەتىستىكتەرى مەن رولىنە جوعارى باعا بەرە وتىرىپ، الەمنىڭ بارلىق مەملەكەتتەرى مەن حالىقارالىق ۇيىمدارمەن جاقسى قارىم- قاتىناستاردى دامىتىپ وتىرعان ەلىمىزدىڭ بەدەلىن اتاپ ءوتتى.
«ي ك ا و ۇشۋ قاۋىپسىزدىگى مەن اۆياتسيالىق قاۋىپسىزدىك دەڭگەيىن جوعارىلاتۋ جونىندەگى قازاقستان تاراپى جۇرگىزىپ وتىرعان رەفورمالاردى، سونداي-اق جالپى اۋە كولىگىنىڭ قول جەتىمدىلىگىن ارتتىرۋىن جوعارى باعالاپ، ولاردى مىسال رەتىندە كورسەتىپ وتىرادى»، - دەپ اتاپ ءوتتى حۋان كارلوس سالازار.
تۇراقتى وكىل قازاقستان باسشىلىعىنىڭ سالەمىن جەتكىزە وتىرىپ، ەلىمىزبەن ازاماتتىق اۆياتسيا سالاسىنداعى كوپجوسپارلى ىقپالداستىقتى دامىتۋ جونىندەگى ي ك ا و-نىڭ قىزمەتىنە قاتىستى قولداۋىن ءبىلدىردى.
«قازاقستان ي ك ا و-نىڭ بەلسەندى قاتىسۋشىسى بولىپ تابىلادى جانە ەلىمىزدىڭ تاريحىندا تۇڭعىش رەت تۇراقتى وكىلدىكتىڭ اشىلۋى قازاقستاننىڭ ۇشۋ قاۋىپسىزدىگى مەن اۆياتسيالىق قاۋىپسىزدىكتىڭ جوعارى ستاندارتتارىن ودان ءارى دايەكتى تۇردە ەنگىزۋىنە ىقپال ەتەتىنىنە كامىل سەنىمدىمىن»، - دەدى ت. تىلەگەنوۆ.
سونىمەن قاتار ول قازاقستاننىڭ ازاماتتىق اۆياتسيا سالاسىنىڭ اعىمداعى جاعدايى، سونداي-اق ەلىمىزدىڭ وسى سالاداعى نەگىزگى باسىمدىقتارى مەن مىندەتتەرى تۋرالى بايانداپ بەردى.
كەزدەسۋ سوڭىندا تاراپتار قازاقستان مەن يكاو اراسىنداعى ءىس جۇزىندەگى ديالوگتىڭ ودان ءارى كەڭەيۋىنىڭ بەيىلدىلىگى مەن ماڭىزدىلىعىن راستادى.
