قازاقستان شەكاراسىن زاڭسىز كەسىپ وتپەك بولعان شەتەلدىكتەر ۇستالدى
باتىس قازاقستان وبلىسىندا شەكارادان زاڭسىز وتپەك بولعان شەتەلدىكتەر ۇستالدى، دەپ حابارلايدى Kazinform ءتىلشىسى.
ب ق و پوليتسيا دەپارتامەنتى باسپا ءسوز قىزمەتىنەن تۇسكەن مالىمەتكە قاراعاندا، كوشى-قون قىزمەتى باسقارماسى قىزمەتكەرلەرى ق ر ۇ ق ك شەكارا قىزمەتى ب ق و بويىنشا دەپارتامەنتىمەن بىرلەسە وتىرىپ، 21 جاستاعى شەتەلدىك قولعا ءتۇستى.
قازاقستاننان رەسەيگە شەكارانى زاڭسىز جاياۋ كەسىپ وتپەك بولعان جىگىتتىڭ جەكە باسىن كۋالاندىراتىن قۇجاتتارى جوق بولىپ شىقتى.
جاۋاپ الۋ كەزىندە ول 2022-جىلى مىسىر ەلىنە سەررا-لەونە رەسپۋبليكاسىنان بوسقىن رەتىندە كەلگەنىن ايتتى. بوسقىن ۆيزاسىنىڭ مەرزىمى وتكەننەن كەيىن جىگىت مىسىر شەكاراسىنان تۇركياعا زاڭسىز وتكەن. سودان كەيىن ارمەنيا، تۇرىكمەنستان، وزبەكستان شەكاراسىنان زاڭسىز ءوتىپ، قازاقستان اۋماعىنا كەلگەن.
«شىمكەنت، الماتى قالالارىندا بولعان ول «ورالدا تۇرعىن ۇيمەن جانە جۇمىس ىستەۋگە كومەكتەسەمىن» دەگەن دوسىمەن اقتوبە قالاسىنا اۆتوبۋسپەن كەلگەن. سول قىزمەتى ءۇشىن 2 مىڭ دوللار تولەگەن. الايدا ول ءوزىنىڭ الدانعانىن ءتۇسىندى. قازىرگى كەزدە ۇستالعان شەتەلدىك ورال قالاسى پوليتسيا باسقارماسى قابىلداپ-تاراتۋ ورنىنا ورنالاستىرىلدى. اتالعان دەرەك بويىنشا ماتەريال جيناقتالىپ، شەشىم قابىلداۋ ءۇشىن ورال قالاسى مامانداندىرىلعان اكىمشىلىك سوتىنا جولداندى»، دەپ حابارلادى ۆەدومستۆودان.
پوليتسيا دەپارتامەنتىنىڭ مالىمەتى بويىنشا سونداي-اق مەملەكەتتىك شەكارانى زاڭسىز كەسىپ ءوتۋ كەزىندە يەمەن رەسپۋبليكاسىنىڭ 4، سيريانىڭ 3 ازاماتى ۇستالدى. بۇلار ق ر اكىمشىلىك قۇقىق بۇزۋشىلىق تۋرالى كودەكسىنىڭ 514-بابى 2-بولىگىنە سايكەس اكىمشىلىك جاۋاپكەرشىلىككە تارتىلىپ، ءبورلى اۋداندىق سوتىنىڭ شەشىمىمەن ەلدەن شىعارىلدى.
ەسكە سالا كەتەيىك، بۇدان بۇرىن باتىس قازاقستاندا جوعالىپ كەتكەن 700 باس قوي تۇگەل تابىلعانىن جازعان بولاتىنبىز.
